› 選擇地區
三藩市
紐約
洛杉磯
其他美國地區
香港 台灣 北美
 
2017年11月01日

將軍澳與中環 - 左丁山

在馬場見到地產代理行高層,佢喜上眉梢,並非因為隻馬贏咗,而係手機不斷收到資訊,佢啲手下捷報頻傳,在一手樓盤奪取「重大的勝利」,為地產發展商盡快達至銷售目標,第一時間去庫存,為人民爭取到安居之所!
簡單用香港話講一句,佢啲手下搵到大量客仔買樓,為新樓盤一Q清袋,佣金收入豐厚,梗係高興到極。香港如此多新樓買家,全不理會金管局發出之加息警告或甚麼辣招,都唔知邊個先至係大儍,係買樓嘅市民儍吖,還是陳茂波陳德霖兩位儍呢?
唔理得咁多嘞,代理高層話:「左丁山,唔同你講馬,不如考吓你。將軍澳樓盤晉海有好靚海景,附近有青山翠綠,住喺嗰度,人都會輕鬆啲,樓花呎價約一萬五千多啲;另一樓盤My Central,位於港島中心地段;樓下係濕貨街市,只有極高層可以有啲維港景,每呎樓價三萬五。兩個樓盤同樣暢銷,加價加推一樣去貨快速。點解兩者之間,呎價相差兩萬呀,同是9百呎單位就相差一千八百萬元噃?」
左丁山立即答:「好易答啫,Location,Location,and Location,投資地產最緊要講地區位置,將軍澳靚樓樓價點會及得上中環。嗱,假設一位買家買咗晉海,在IFC返工,朝早要八點零就出門,如買咗My Central,朝早八時十五分先至起身梳洗,仍可以在九點前回到IFC返工。時間就是金錢呀!」
地產代理讚左丁山叻仔,有資格做地產經紀咁話。其實佢講呢兩個樓盤,就係一個活生生例子證明:時間就是金錢,相差一小時嘅方便(convenience),價值可高達兩萬元(每呎計算)。如果你有二千萬元,你願意用呎價三萬五買一層511呎嘅中環新樓吖,還是買將軍澳一層千三呎住宅呢?從另一個角度睇,有咁多人願意買中環樓盤,亦顯示目前香港有太多投資性資金,不願閒置在銀行收取零息,索性以高價買入市區中心樓盤,作出租用途,例子係:據報導,蒙民偉第二任太太買咗兩個My Central單位,蒙太大把樓住啦,仍然要買,不排除係作收租用途。出租據講可以租到每呎100元,有三厘以上回報,證明強勁租樓需求係樓價高之基礎!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載