› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

支付寶 - 左丁山

科技大學經濟學教授雷鼎鳴在香港大名鼎鼎,同行(如關焯照博士)慣咗稱呼佢做雷公,雷公個名夠晒巴閉,「鐘鳴鼎食之家」出自王勃「騰王閣序」,雷公左丁山一代中學生,邊個冇讀過呀,睇個名就會以為雷公係大富人家之後,實情如何,左丁山就不求甚解,冇深入研究。
雷公本來已經出晒名,最近因在公開論壇講及內地電子支付技術發達,可完全不用現金,引述朋友舉例:「叫雞都可以用支付寶」,於是轟動學界,與女議員葛珮帆對罵,如果真係辯論,梗係雷公贏晒啦,芝加哥大學經濟系畢業,明尼蘇達大學博士vs巴基斯坦某大學博士,你買邊個贏?但呢件事與最近英美政壇影壇一連串性騷擾事件串埋一齊,雷公當然處於不利位置,都係少講為妙。
其實雷公份人非常正經,標準老實讀書人一個,精研金庸武俠小說,對岳不群韋小寶之術非常熟悉,點會犯錯吖。一位朋友矇查查咁講:「雷教授叫雞唔會用支付寶咁笨呀?」當然冇咁嘅事,唔好亂噏。商界朋友告知,三十幾年前澳洲伴遊女郎會帶埋信用咭碌機在身,事畢就收信用咭付款,只有蠢材先至會真係碌卡嘅啫,當然係要現金交易,不留電子紀錄。內地人大概不知私隱為何物,或早已認命,橫掂「大阿哥」由北京開始,全面監控人民所有活動,用唔用電子付款都係會俾街坊組長打小報告嘅啫,咪索性貪其方便,用支付寶或微信支付各式各樣服務囉。
香港人就唔同,點都還要保留少少秘密,唔想揭開肚皮俾人睇晒,所以對支付寶呢回事,還是有抗拒感,左丁山就更鍾意用多啲香港土產「八達通」嚟支付小數目。唔用支付寶,唔代表香港科技落後,只係內地社會意識與心態與香港有所不同啫,中國政府大力支持支付寶、微信支付,係因為呢啲科技除咗方便隨時監控人民活動之外,還可以追稅查稅,香港的公司唔肯接受八達通,表面係成本問題,深入啲就係稅務問題嚟㗎!支付寶之港澳地區總經理李詠詩(Venetia)算係世姪女,佢爸爸就係中大著名社會學教授李沛良(已榮休),畢業於柏克萊及史丹福電腦科學系;最近見到世姪女,佢話好忙好忙,正在開發的士及街市客戶,希望擴大市場佔有額,祝佢好運啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載