蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月25日
馬上成為壹會員

醫療與退休 - 左丁山

有兩位讀者最近來電郵,一位對香港成為「醫療中心」(Medical Hub)說不以為然,另一位就係退休不久,揸住筆退休金,問左丁山意見。
先講醫療。香港係自由開放地方,打開門做全世界生意,絕不可能阻止外國人來港買衫買鞋買珠寶以及買醫療服務,否則香港一無天然資源(如汶萊),二無土地耕種(如紐西蘭),百幾年來都係靠貿易與服務嚟食飯嘅啦,自1842年至今共175年,吃工業飯時期,只係1950(粗創)至到1985年(全盛)左右,即35年,工業初起時靠蘇浙紡織商之北水南下,帶資金及技術來港,其後發展至塑膠電子玩具等等等,至1982-85年左右達至頂峰(以製造業工人數目計),之後工廠就急速北移,現時製造業工人數目已微不足道,香港又試回復自由貿易港本色,再加上1970年以後發展出嚟嘅金融中心。覺得單調一啲?可以諗吓其他高增值服務嘅,香港因醫學比鄰近地區更發達,有比較優勢,碰啱亞洲地區,尤其是人口龐大之中國對康健服務與日俱增,香港絕對有條件成為地區性醫療中心,曾蔭權提出之Medical Hub其實冇錯。現在我哋唔再提,內地病人咪一樣照嚟香港就醫!醫療服務界不能擴容(缺新醫院、缺醫生護士)而病人源源而至,你話點搞?閂埋門唔畀外人來港就醫呀?公立醫院還可以,私立醫院就絕無道理。梁振英唔鍾意曾蔭權而拋棄Medical Hub政策,係一個歷史性錯誤。
至於讀者退休,問如何投資退休金,咁就要好小心,根據滙豐保險退休金部嘅調查與計算,一個香港兩人家庭之退休金需要可分三組:(一)每月定期收入九千多元至接近一萬、(二)月入近三萬八千元、(三)每月近五萬元(充裕級)。左丁山按一些穩健、公認派息穩定的公用股股息計算,以中華電力派息為例,每股派息2.8元,如持有21萬股,每月收入便4萬9千元,如有4.3萬股,便月收股息1萬元。以每股股價79元計算,需資金339.7萬至1659萬元。如買入另一隻公用股,港燈(2638),假設以後能繼續維持每年派息40仙的話,再將上述投資額按每基金單位7.17元計算,需要的資金為1054萬元至215.1萬元。來郵嘅讀者可按自己可動用嘅退休金數目,自行計算。不可不知,退休人士最重穩定、少變的長期現金收益,不可貪求科技股有高增長,科技服務通常好少派高息(例如騰訊派息率只有0.15%),買咗騰訊必然唔想賣,試問日常生活費從何而來!(按:上述股價於交稿後已有變動)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載