› 選擇地區
三藩市
紐約
洛杉磯
其他美國地區
香港 台灣 北美
 
2017年12月02日

美國壞教材 - 左丁山

資料圖片

美國真係一個好壞嘅反面教材,專門教壞香港學生,做成教育問題,一定令到中聯辦主任王志民好唔爽。
乜唔係啫,美國總統特朗普望之不似人君,成日同民主黨、反對派、黑人球員、女士鬧交,係一個壞榜樣。最弊嘅係,俾總統鬧嘅人居然夠膽駁嘴,令香港學生覺得好過癮,可能會反問「美國能、點解中國不能」?咁就唔好啦,堂堂習主席一言九鼎,習近平思想必須信者得救,習主席次次一錘定音,冇人敢阿吱阿咗,咁先至叫做維護習核心,咁先至叫做愛國嘅嘛。
哈,美國人真曳曳,總統諷刺參議員伊利沙白華倫(前哈佛法學院教授),話佢係Pocahontas,華倫居然罵總統有種族偏見!
影星Bruce Willis對記者話特朗普係最適合做總統嘅人,好可能係美國歷史上最佳總統,美國人不團結在特朗普核心周圍,係大錯特錯。網民立即留言大罵,互相駁火,證明美國人好唔愛護總統,即係好唔愛國。
特朗普同習近平講幾句說話,中國就放生UCLA籃球隊三名涉嫌高買嘅球員,球員父親唔感恩下跪流涕,居然仲講:「做乜嘢要多謝特朗普」,佢就係唔怕秋後算賬,被指尋釁生事喎,完全視國家總統權威如無物。
金州勇士隊,新英倫愛國者隊上個球季分別奪得NBA、NFL冠軍,按傳統會去白宮,由總統接見,嘉勉幾句,並送球衣畀總統嘅,但兩隊嘅大牌明星級球員都唔願去白宮。勇士教練居爾更批評總統不遺餘力,咁唔俾面國家元首,好無禮貌啫,美國NBA、NFL有冇教訓、懲戒呢兩隊呀?冇囉。
NFL球員在球賽開始前唱國歌時刻,不嚴肅站立,右手按左胸,竟然有人仲單膝跪地,唔尊重國歌法,令特朗普暴跳如雷,要求球會嚴懲球員,竟無球會響應,大損美國國歌法權威。
仲有,有關國家安全問題,美軍將領竟然夠膽話必要時違抗三軍總司令,即美國總統特朗普之發射核子彈頭命令!嗰位司令員話:「我哋有腦筋嘅!未必會盲從!」可怒也,在中國有人敢講半句挑戰習近平軍委主席權威嘅,即時連降18級,革職查辦。
以上種種美國事例,直情教壞香港學生,原來美國人可以隨時挑戰領導人而唔駛坐監嘅,睇呢類啲新聞睇得多,仲會聽王志民傳聖旨?幾難咯!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載