› 選擇地區
三藩市
紐約
洛杉磯
其他美國地區
香港 台灣 北美
 
2018年01月28日

十大名中學 - 左丁山

昨日談及地產Y,佢話多時不見,立即約食午飯,於是前幾日去咗佢辦公室附近嘅西班牙餐廳OLE,就在雪廠街最上嘅一段,隔籬就係順豪大廈,離FCC好近。呢間餐廳以前嚟過,但因為位於斜路之上,左丁山行上去會喘氣,故此幾難時時去,都係去上海總會多,夠近夠舒服吖嗎!
OLE由西班牙人做老闆,印度人管理,地產Y話夥計多是尼泊爾人。呢度本來以西班牙燒乳豬最好食,不過呢日有傷風,無謂食咯,飲個包冇撞板嘅南瓜湯,十分可口,可惜主菜劍魚只係幾麻麻。
地產Y亦奇人也,讀完中學就考入政府做量地官,在新界地政署工作,見過不少界別怪事,話新界地政與僭建自古以來已有說不出的複雜與荒謬,對律政司司長鄭若驊之獨立屋僭建事,只能一笑置之。
地產Y憑對地政之熟悉,被地產商挖角,離開政府後先後加入不同地產公司,薄有名氣後先至以成年人學生身份,到港大讀咗一個學位,故此佢對甚麼名校出身論,嗤之以鼻,指讀名校未必就係叻晒、能在社會出人頭地,佢大大聲講:「左丁山你又讀過乜嘢名校呀?咪又同我一樣咁渣!」於是相對大笑,舉杯同飲熱檸水。
吃飯之前兩日,收到一個教師朋友傳來嘅短訊,列出2017年12月23日「香港專業導師協會」(ProfessionalTutor.hk)引用,來自「香港專業教育出版社」製訂嘅香港十大名校名單,由第一名至第10名係:(1)聖保羅男女,(2)女拔萃,(3)喇沙,(4)皇仁,(5)聖瑪利,(6)聖保祿學校,(7)瑪利諾修院,(8)道教鄧顯,(9)英華女校,(10)聖公會曾肇添,(10)男拔萃。十大名中學之中,只有一家皇仁無宗教色彩。左丁山問教師:「名單可唔可靠呀?」佢話:「聽講係計算公開試成績得出嚟嘅,應該幾可信。」
左丁山讀書時代,還沒有鄧顯與曾肇添,傳聞之中,呢兩間傳統文法中學係以考試至上,畢業生入大學者不少成為律師,醫生,建築師,會計師,工程師等等。肥仔K就係曾肇添學生,不過佢屬於成績差學生一類,讀完中五就返唔到去讀中六。左丁山故意傳畀獅子王睇吓,獅子王即刻有回應:「我間學校十大不入噃」,問佢係邊間,佢話係St. Paul Boys,唔怕啦,出產咗曾鈺成曾德成兄弟,又有劉兆佳、葉澍堃等名人,都好巴閉呀,獅子王駛乜悶悶不樂啫!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載