› 選擇地區
三藩市
紐約
洛杉磯
其他美國地區
香港 台灣 北美
 
2018年02月02日

人民日報要求霹靂手段 - 左丁山

浸會大學的「普通話必修」事件,經香港的藍絲帶不斷渲染,文匯大公報的窮追猛打、揭底,已演變成政治事件,1月29日「人民日報」發表一篇評論文章:「香港高校管理層的腰桿可以再硬些」,作者署名張慶波,痛批浸大「跪低」(檢討普通話考試),指「姑息這批不法無德的學生和老師」,更由此引申到其他大學的學生行為,要求「以霹靂手段顯菩薩心腸,高校管理層的腰桿子不妨再硬一些」,點樣「硬」法呀?即係對「違規」、「違法」學生要實施限制,「規誡」、與「不務正業」的教師不續約或解除,達到嚴管也是厚愛。講到明白啲,香港啲大學校長以後要對學生強硬呀!
點知自少信奉馬列,幾十年受黨栽培嘅曾鈺成唔識趣(或者未知人民日報會喊打),在1月27日出席香港中學校長會舉辦嘅「國際教育論壇」上致辭,竟然講:「現科技發展快,教育制度要適應,應該給予年輕人發言權,包括用粗口鬧老師的年輕人」,有咁啱得咁蹺,兩名遭停學學生之其中一位,陳樂行就係曾鈺成嘅聖保羅書院小師弟,聖保羅校友果然有心靈感應。
嘩嘩嘩,曾鈺成想作反乎,竟然唔跟party line發表意見,唔怪得冇法子可以參加競選特首。對浸大「普通話必修」事件,左丁山本來蒙查查,唔知係乜嘢事,後來在不同WhatsApp群組收到幾次愛國才女嘅大作及「惡過黑社會」嘅浸大學生佔領「浸大語文中心」嘅錄影片,想唔知道都幾難。今時今日,每個香港人都會參加幾個WhatsApp群組,而每個群組總會有一兩個藍絲帶,於是同類訊息與影片,好快就傳遍全港,連退休幾年嘅沙田陳太都從一位移民加拿大嘅同學收到,而加拿大同學就係從另一個群組收到嘅。陳太嘅弟婦就自「人事專業」群組收到,一位人事管理經理係藍絲帶,專門在群組廣傳攻擊中大港大浸大學生不文明、不禮貌、講粗口嘅訊息,尤其是愛國才女嘅批判文章。自雨傘運動之後,香港政治光譜已分兩極,黃絲帶市民冇乜組織,慣單打獨鬥,但睇得出藍絲帶有組織,有謀略,有線眼遍佈各團體機關,每有事情發生(例如大學生講粗口),好快就有影片上網,跟住WhatsApp傳播全球,然後大公文匯跟進以極大篇幅報導,「各界聲討」,「全城憤慨」,之後呢,就有愛國才女文章出爐,文章然後在網上廣傳,大舉造勢,而浸大普通話事件更升溫至「人民日報」警告大學校長須要強硬腰桿,睇嚟還有下文。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載