› 選擇地區
三藩市
紐約
洛杉磯
其他美國地區
香港 台灣 北美
 
2018年02月06日

醫護人員荒 - 左丁山

香港護士協會前星期刊登全版報紙廣告,喊苦伸冤,指在公立醫院工作量繁重,工時太長,人手不足,加上近期乙型流感肆虐,公立醫院逼爆,護士更加做到嗌救命。
廣告一出,有啲效用噃,特首林鄭自天堂達沃斯回到香港地,從雪嶺勝地返回塵間,就知道公立醫院係需要保護嘅機構,一旦頂唔順壓力而崩潰,整個香港會跌落為三級甚至四級城市,對香港聲譽影響極大,因此都算佢精,立即宣佈撥五億元額外撥款畀醫管局,畀膽醫管局去實施臨時方案,多請兼職人員及文職人員,叫做可以幫輕吓護士嘅工作。
香港市民凡入過公立醫院都知道,香港醫生護士人手荒,政府與醫護界一直不肯正視,一貫採取保護主義,做到自己幾乎瞓低,都唔肯唔准政府輸入外勞(即外國註冊醫生、護士)。香港目前有一間天水圍醫院,興建落成,但因缺人,只能局部開放,審計署查出公立醫院買入新儀器,到了報廢期仍然未用過,因為缺乏技術人員,故此社會要求特區政府放寬限制,容許外國大學訓練嘅香港人子女醫生護士回港註冊,合乎情理。但到目前為止,特區政府一於詐作聽唔到。據董建華創辦之團結香港基金副總幹事兼研究部主管黃元山及該基金研究人員曾聖宇發表嘅文章(經濟日報,二月一日),香港嚴重低估缺乏醫生嘅數量;德國每一千人有醫生5.8名(以下比例均是每千人計),英國3.7名,美國3.3名,新加坡2.3名,香港1.9名!香港目前有醫生14013人,唔好話追上德國咁先進嘞,追上新加坡得唔得?咁就需要額外醫生3千人,即增加醫生數目21%,根本無法從兩間大學醫學院找到足夠學額。培養一名合格醫生要七年,一名專科醫生要十年以上,故此如要解決醫生荒,非輸入外國大學醫生不可,例如英國澳洲嘅香港人醫生,香港薪水及思鄉情足夠吸引佢地回流。護士亦係一樣,目前外地護士回港考註冊試,及格率偏低,2013年實習試及格率係33.6%,2014年只有4.95%,2015年僅25.86%,考試成功率十分飄忽,考3次肥佬就以後失去重考資格,一位澳洲畢業護士,想回港考試,但原來連考試資格都冇,要先再上課二百小時先有資格報考喎,香港啲護理水準高過澳洲大學咁多,令人肅然起敬!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載