蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年02月14日
馬上成為壹會員

何須法官調查 - 左丁山

因乙型流感在幼稚園及小學爆發,引起醫學教授與著名男女歌星黎明、謝安琪隔空口水戰,都幾趣怪。香港係一個永不沉悶嘅城市,一件新聞頂多熱鬧幾日,就會有其他新聞冚過嚟,例如律政司司長、建築法律權威、資深大律師、特許工程師鄭若驊並不知道家裏有僭建呢單新聞,現在邊個得閒去理呀?特區政府一早明白呢個道理,對司長僭建一事,一於採取拖延戰略,由建制派議員在立法會力阻泛民議員狙擊,對傳媒公眾則一味拖延,成日叫大眾包容,畀時間空間讓鄭司長處理。呢樣公關策略,並非新創,1992年克林頓當選美國總統後,每遇上醜聞,就運用呢樣stalling tactic,用到出神入化,共和黨與傳媒莫奈他何。
果然呢,乙型流感新聞鋪天蓋地,無端端出咗一單謝安琪網上談流感針,就即刻網上瘋傳,成為眼球焦點,跟住2月10日又發生九巴雙層巴士在大埔滘松仔園區域發生大災難,19人死亡,林鄭立即宣佈成立由法官主持嘅獨立委員會去調查,呢招係港英教落嘅,屬拖延戰術之一種,由法官主持調查,起碼搞幾個月,令傳媒不得不繼續跟進報導,又唔駛掛住鄭若驊司長單嘢啦。
其實巴士失事,駛乜要由法官主持獨立委員會去調查咁緊張吖,失事道理一字咁淺,就係巴士司機揸車不小心,涉嫌超速,由運輸署及警方交通部去查清楚巴士維修,巴士零件及司機是否有情緒問題,已知問題所在,邊度需要動員法官及律師呀,盞費時失事。大埔公路由駿景園往大埔市中心一段,有好多彎路,左丁山常由此揸車入中文大學校園,開車車速60km已覺得幾快,如接近70km,已有危險性,據報導,九巴司機揸雙層巴士車速超過70km,實在十分牙煙。過往咁多年,馬場散場之後,巴士在彭福公園外,銀禧花園對面之巴士站接載馬迷離開,歷史悠久,左丁山也曾坐過,從未有大意外發生,故此呢場210災難,幾乎肯定係人為事件。司機有問題,或者係反映到巴士公司人手短缺,司機不足,新司機訓練不足,就要上陣。背後代表嘅係香港失業率(2.9%)極低,勞工缺乏,豈止公立醫院有人手荒,各行各業亦然。林鄭政府早知有問題,不如成立一個香港人力方案委員會,研究如何加入外勞,向新加坡學習啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載