› 選擇地區
三藩市
紐約
洛杉磯
其他美國地區
香港 台灣 北美
 
2018年02月25日

買報紙 - 左丁山

二月二十一日年初六,趁住仍然未開工,晨咁早起身睇波,當然係睇歐聯十六強賽事,車路士主場迎戰巴塞隆拿,車仔賽前被睇低,主勝賠率有3.45倍,巴塞客勝唔夠2倍,心郁郁想下注買車仔,但回心一諗,巴塞名震天下,歐洲強隊對住巴塞,每每怯怯地驚住輸得難睇,於是即使在主場也要加強防守,不敢狂攻巴塞,中文講叫做輸咗氣勢,英文球評就話show Barca too much respect,雖然巴塞在史坦福球場好似未贏過車仔,都係縮注好嘞,一於純睇波。
果然呢,車仔擺出無前鋒陣式,大射手基羅特與莫禮達都做後備,成個主守格,巴塞控球在腳,全場控制形勢,但冇法子搵到機會射門,意想不到車仔韋利安神勇,射門三次,兩球中柱,一球死角入網,以為可以贏得,但最後後衛基斯坦臣發昏,在禁區橫傳去無人地帶,俾恩尼斯達截到帶入禁區,後傳畀幾乎全場隱形嘅美斯,冷靜地一抽入網,逼和車仔!呢場波其實巴塞表現不及水準,只是一來車仔怯於對方威名,唔敢搶攻,二來欠運,兩球必入球都中柱,次回合到魯營球場,點秤都係巴塞佔優咯。
睇完波小休30分鐘,大約六點幾就落樓買報紙;以前有人派報上門口嘅,但銀禧街市間姚華記宣佈不再派報,另一間亦不再派報,於是好多家庭都要派菲傭到7-11買報紙。菲傭唔識中文,年初五叫佢買六七份報紙,寫埋中英文名畀佢,但仍然買唔到「明報」,反而多咗一份星島,菲傭報告:「店員話冇明報,畀咗份星島我。」咁都得?於是年初六趁天光就自己落去買,但原來落樓太早,樓下7-11只有東方蘋果,及年初五嘅星島,於是行去火炭火車站,第一間7-11還在叠緊報紙,再走到鐵路大廈對面,車站內7仔,有齊嘞,獨冇明報,於是轉頭行去銀禧街市,姚華記報檔唔知係執咗還是在放假,冇開鋪,唯有行返樓下嘅7仔,已近早上七點,售貨員仍然話:「冇明報呀!」一位朋友問,點解你買咗七份報紙還是要買多一份明報?嘻,朋友有所不知咯,年初六星期三有夜馬,左太係要睇明報高乘駿、任縱橫貼士嘅,其他日子,佢唔會買明報!從小事看大局,便利店已控制新界之報紙零售,報攤愈來愈少,派報逐漸絕跡,與20年前之報紙發行蓬勃情況,相差甚遠。想當年,欠派報公司六千元,催佢哋嚟收錢,佢哋仲話:小數目啫,遲啲至講!當年之豪氣與今天之無人派報,情況迥異,亦反映出印刷收費報紙經營不易也。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載