› 選擇地區
三藩市
紐約
洛杉磯
其他美國地區
香港 台灣 北美
 
2018年04月26日

粵菜小店難捱 - 左丁山

酒店及旅遊學院、中華廚藝學院及國際廚藝學院fb圖片(互聯網)

一班老友組成嘅每月晚飯飯局,食咗二十幾年,卒之食到除咗分析F之外,人人已過咗退休年齡,人人都冇咗公司私人秘書,於是年幾前再無秘書聯絡安排,飯局暫停咗近八九個月。卒之賓架W同財務L因為合資在灣仔開咗一間「顧問公司」,請咗一個秘書,於是由呢位秘書小姐一個人負責晒聯絡工作,飯局重開。其實佢兩位都唔做生意嘅,根本唔出街搵客,只係想有個辦公室在市區出入,方便應酬而已,實際上,佢兩位專做無糧義工及公司獨立非執董,都需要秘書幫手跟進一啲文書工作及睇回覆email嘅。分析F就自動放棄咗極高薪職位,埋首於不少有辛苦冇糧出嘅公職,賓架S仲成為無糧公職王,我地笑佢攞苦嚟辛,因為佢因公開會,可以連開18小時,去廁所都試過畀人批評話係「鬆散」,死未!有時覺得,香港今天仍然能夠運行如常,與呢類人(分析F,賓架S之流)肯犧牲個人時間,服務社會,不無關係。好似左丁山咁,生性疏懶,有空閒時間就情願到馬會馬場,其他事情唔好搞。
上星期輪到左丁山做東,本想訂陸羽吃晚飯,點知賓架W來電郵話,耀華街一間小店漁一在四月二十五日結束營業,叫我地去漁一聚會,於是以佢熟客面子,搵到一張枱,去同漁一老闆講拜拜。漁一樓上店並不大,好易爆棚,平時生意非常好,賓架W對漁一結業,甚為不捨,問老闆:「係唔係加租太勁呀?」老闆話:「加租到50元一呎,係難頂啲嘅,但最慘係請唔到人,大家做到索氣,洗碗工都要萬八蚊一個月,其他你識計嘅啦。 中華廚藝學院畢業嘅年青廚師,個個鍾意做西餐,簡單易做吖嘛,入酒樓學習炒煮蒸燜燉炸煎,幾百樣廣東菜,複雜到死,邊度有耐性吖。廣東菜飯店,都幾難招聘或者留住新廚師,我地大廚都係股東,做到踢腳,大家同意之下,咪結束營業咯!」原來如此,老闆話日常皮費,當然以食材、租金、工資為三座大山,人工佔比例最高,有三成幾,租金大約係總皮費之15%。呢個比例係呢個行業嘅基準,每間食肆不會相差太遠。聽完老闆講,就可以知道香港地道粵菜飯店,前景堪虞,年青顧客鍾意西餐,年青廚師鍾意做西廚,再加上勞工短缺,逐漸冇得玩嘞。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載