› 選擇地區
三藩市
紐約
洛杉磯
其他美國地區
香港 台灣 北美
 
2018年05月11日

獨尊馬克思 - 左丁山

近日特區政府教育局不知是否有意試水溫還是無意中捲風起浪,主動製造教育界分歧,例子一就是認為「香港位於中國南方」呢個句子唔夠精確,例子二係引用中大一位普通話學科導師嘅文章,內有提及「粵語不是母語」,例子三就係突然間話要檢討通識教育,只列為考試及格、不及格,再無5**、5*等分級,以香港學生及學校之讀書只為求考試分數之性格,假如將來通識教育科只有「及格」、「不及格」兩類,老師想要學生多鑽研通識科,好難咯。
不過時勢瞬息萬變,中央領導人尊崇馬克思為千年來第一思想家,中央政治局常委集體學習「共產主義宣言」之後,全國一片唱和之聲,由中央電視台領頭捧馬,介紹馬克思思想的宣傳攻勢,似鋪天蓋地而來,呢一陣狂風,會唔會吹來香港呢?香港中學通識課程好多時以時事介讀、分析為主,講唔定明年考評局就出試題問學生:「我認識的共產黨宣言,試描述之。」
咁就好玩咯,教育局副局長蔡若蓮可記一功,2019年中有望坐正做教育局局長,全國捲起學習馬克思主義之際,香港要融合國情,冇理由唔要中學生認識Communist Manifesto嘅啫。
左丁山就弊啦,唔識㖭,問肥仔K讀過未,佢話:「在UCLA上政治理論課,教授要我地讀足本資本論,一讀就覺得沉悶無比,讀咗一大半,卒之放棄,我諗香港本地大學生之中,冇邊個有心機讀資本論呀!」咪係囉,讀新亞之時,為咗追時髦,叫做讀過資本論幾頁,但上經濟學課程,一位美國講座教授講馬克思思想,由頭到尾都只講一樣,額外勞動價值(Surplus Value Of Labor)及剝削勞工理論,悶到失魂。新亞嘅大陸逃港經濟學教授呢,就日講夜講「馬克思批判」;張德昌先生教西洋經濟史就教我地讀埋The Road to Serfdom(到奴役之路),一讀完,就全部反馬克思啦,何況當年正是文革高峰期,見到紅衛兵高舉小紅簿大講馬恩列史毛,大家心都驚晒,鬼肯去讀共產主義宣言咩。錢穆先生更痛恨內地以馬列觀點詮釋中國歷史,所以新亞生邊會信馬列吖!崇基沈宣仁先生就好嘢,設計「基本綜合學習」(IBS)課程,所有崇基學生必修,三年級上學期就要讀「共產黨宣言」,賓架P今時今日仍然記得好清楚,於是笑佢:「你領先特區政府官員數十年,林鄭若開會溫習Manifesto,你大可去講番一堂!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載