› 選擇地區
三藩市
紐約
洛杉磯
其他美國地區
香港 台灣 北美
 
2018年05月31日

利物浦輸在後備力弱 - 左丁山

互聯網

皇馬贏咗利物浦之後,歐洲球迷在網上大罵皇馬茅波(拉莫斯整傷沙拿),埃及球迷激動,聲言唔畀拉莫斯進入埃及境,英國球迷向利物浦門將發出死亡威脅,埃及體育部長向埃及國民派定心丸,埃及歷史上最偉大的球員沙拿一定可以參加世界盃。香港網民呢?一片哀痛之聲,亦對拉莫斯非常不滿!
一場球賽,牽動全世界上億球迷情緒,以前比較少見,原因大概不在於皇馬贏波(其實贏慣),而係皇馬贏波過程,好令利物浦以及中立球迷(如左丁山)覺得非常不服氣。如果利物浦陣容完整,皇馬靠比路嗰一個絕世倒掛金鈎,贏一比零嘅話,大家無話好講,偏偏係沙拿在上半場三十分鐘俾拉莫斯搞到傷咗膊頭,流淚離開球場,嗰一幕令球迷冇晒心機,知道場波大勢已去,皇馬贏咗九成嘅嘞。上半場頭25分鐘,利物浦前場緊逼,圍攻皇馬,佔球率達60%以上,但沙拿一走,形勢逆轉,皇馬放膽反攻(因冇咗沙拿快攻威脅),入替之拉蘭拿係廢嘅,皇馬之後㩒住利物浦嚟打,入球取勝係遲早之事。
拉莫斯係唔係故意傷害沙拿呢?應該唔係,但拉莫斯係老江湖,沙場老將,平時踢波夠狠,24分鐘之時,知道自己如果搶唔到沙拿腳下皮球,俾佢轉到身嘅話,有極大機會輸波,所以立即「職業化犯規」,係要拉跌沙拿,大家一齊跌低,佢又驚沙拿起身快過佢,帶波前進,於是借意在下跌時,成個身砸落去沙拿。佢係一個成熟富於經驗嘅球員,經常在球場上詐傷碌落地下,拖延時間,阻止對方進攻,所以對沙拿並非惡意傷人,而係專業球員犯規,黃牌都唔駛攞!沙拿之受傷,算係非常唔好彩,足球上帝愛皇馬,有乜辦法啫。
利物浦輸第一球係龍門卡力斯發昏送禮,史上最大之龍門球員錯誤。失第二球無話可說,失第三球又係卡力斯用手送球入網,故此利物浦球迷喊到出唔到聲。但看深一層,利物浦後備實力明顯不足,沙拿傷出,換上拉蘭拿,級數相錯太遠嗱,反之雙方打成一比一之時,施丹換出艾斯高用比路入替,比路係球星級,一入場就射入世界波,可見皇馬後備力量高超,但利物浦已無人可換,後段球員疲乏,反先無力啦!利物浦下季爭標,非要加強後備兵源不可。
打完之後,卡力斯扒在場上掩面痛哭,冇一個利物浦球員去安慰佢,卒之由皇馬球員拍卡力斯背脊,叫佢起身,守龍門有此大錯失球陰影,心理學家話卡力斯要起碼三個月先至有可能回復平靜,但陰影將伴其終身。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載