› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

特朗普四條戰線 - 左丁山

資料圖片

午飯後周圍行,時近三點,在萬宜大廈商場內撞到一位新進分析師,乃新亞師弟之子,於是問吓呢位分析Y:「個市點睇呀?」分析Y話:「Uncle,現在做甚麼分析都唔夠特朗普講一句,我地現在日間買咗股票,晚上特朗普在白宮講幾句嘢,發一個Twitter,就足以隊冧美股,或者令美股大升,點知佢開邊瓣啫,依家買賣股票好似同特朗普對賭,好容易短炒變長揸,唔買唔賣最安全。」
幾十年來未見過如此政客玩家,一位美國總統會咁多口,又經常變臉,搞到全世界股市睇住佢轉動嘅。以前知道美國總統最有權力,特朗普將總統權力發揮到淋漓盡致,充份表現美國、美元之霸權有無上威力。
特朗普年逾七十,如2016年競選時,前美國眾議院議長(共和黨)金里奇講:「特朗普已經七十歲,係一個成功商人,億萬富豪,無可能入主白宮後就會改變性格。」果然,特朗普率性而行,似毛澤東老年咁,愛與天鬥,與地鬥,與人鬥。首先退出巴黎氣候協議,盡量放寬美國環保局(EPA)規則,就係與天鬥,與地鬥,但最鍾意還是與人鬥,驚死得閒得滯,主動開闢四條戰線:
(一)與北韓鬥,大拋浪頭,逼金正恩就範,且看6月12日新加坡特金會有何結果。
(二)與盟友鬥,5月31日在豁免加拿大、墨西哥、歐盟嘅鋼鋁關稅到期前,商務部長羅斯宣佈向盟友徵收關稅,豁免冇得傾,令盟友撞火!立即向世貿組織(WTO)投訴及宣佈向美國徵收報復性貨物關稅。
(三)與中國鬥,軍事方面將太平洋美軍司令部改名為印太司令部(Indo-Pacific),即是將印度洋劃入美國艦隊佈防範圍,明顯係針對中國海軍,另一方面就向中國徵收5百億美元貨物關稅,6月15日宣佈詳情,展開一場中美貿易戰軍事競賽與及科技爭鋒。
(四)內鬥,主動要求司法部調查FBI與特別檢查官穆勒對抗,大打公關戰,美國總統調查美國「公安局」歷史上罕見。目前美國經濟勢頭幾好,失業率低(3.8%),通脹低(2%以下),GDP增長穩定,公司盈利好,本是盛平局面,特朗普偏要與全世界及美國內部搞對抗,製造事端,到頭來好容易害了美國經濟與國際和平。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載