› 選擇地區
三藩市
紐約
洛杉磯
其他美國地區
香港 台灣 北美
 
2018年06月07日

中美鬥爭下之香港 - 左丁山

美聯社圖片(美聯社)

特朗普對付中國崛起,打貿易戰不足為奇,北京應該早已料得到,有所準備,可以牙還牙。大凡打貿易戰,好難有贏家,多數係雙輸,睇吓邊個輸多啲而已,美國嘅新一代分析師經濟師讀經濟學理論,十居其九擁護比較優勢論(Comparative Advantage),反對重商主義。偏偏特朗普就聘請一位重商主義者拿華路(Peter Navarro)做白宮首席貿易顧問,可知道特朗普根本不相信現代國際貿易理論,故此一位年青評論員就指過咗70歲嘅特朗普,思想古老,至今仍以為製造業係美國命脈,鋼鐵與汽車事關國家安全,而年逾80歲嘅商務部長羅斯亦係咁諗。殊不知美國早已是一個服務型經濟體系,製造業已搬往墨西哥、中國、東南亞,特朗普用關稅來保護製造業,根本對美國總體經濟弊多於利。
特朗普嘅白宮話晒事,內閣部長只能講Yes Sir,連財政部長講中美貿易戰暫停(on hold),也在內部受拿華路痛批,之後再唔敢出聲。到目前為止,美國與中國之貿易戰,軍事冷戰還未夠白熱化,反而美國國務院突然宣布收緊對中國留學生簽證規定,係一個重拳,中國難以報復,難以招架。
目前外國留美學生之中,中國有超過30萬人,2004年只有6萬2千餘人,人數一路急升,到2013/14已有21萬多人,現在當然已超過30萬,係美國大學嘅龐大顧客群,呢次美國有針對性,只係收緊研究生到美國攻讀機械人學(AI)、航空學及高科技製造業等「中國製造2025優先領域」,呢類學生只能得到一年簽證,實則係廢嘅,因為讀研究院,起碼2至5年,逐年簽證喎,學生心理大受影響,點有心機做研究呀?特朗普明顯係唔想最尖端科技領域知識傳授畀中國學生,等佢地畢業後帶回中國!
因有此項決定,左丁山想起,香港會唔會有利呢?如美國人繼續視香港為一國兩制之特別行政區,內地研究生來香港讀博士,專攻尖端科技,讀完就可以取得香港身份證,再用香港特區護照申請到簽證到美國做博士後研究AI之類,咪係間接貢獻中國發揮「向南窗」嘅作用?習近平特批內地經費支援香港科研,係有理由嘅,現在就睇吓林鄭識唔識做,不讓香港得罪美國嘞!
(按:之後有報導講美國國務院「澄清」對中國學生簽證保持不變,但只有中文傳媒報導此事,獅子王在CNN,BBC,CNBC網站搜尋,搵唔到呢段「澄清」新聞。)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載