› 選擇地區
三藩市
紐約
洛杉磯
其他美國地區
香港 台灣 北美
 
2018年06月20日

陸恭蕙講馬克思 - 左丁山

標準不折不扣嘅布爾喬亞分子陸恭蕙Christine Loh,前任環境局副局長,突然間在南華早報(6月13日)發表一篇文章:Does Marxism have a role to play in Hong Kong,不少中環友睇完嚇咗一跳。南華早報網上版有讀者留言,據肥仔K講,多數係與陸小姐打對台。
陸小姐三十幾年前與左丁山見過一兩次面,當時佢係菲利普兄弟(大商品交易商)嘅交易員,滿身資本主義色彩,九十年代加入于品海嘅「智才」,負責搞Loft,專門針對讀完大學嘅自由派小資產階級市場,完全站在馬克思對立面。
點解現在陸小姐話馬克思主義在香港有一個角色呢?唔通係勤力閱讀「習主席談話──重溫共產黨宣言」嘅結果?究竟馬克思主義如何在香港應用呀?細讀陸小姐鴻文,原來又係一啲「開始向左傾」知識分子嘅迷思,即認為資本主義有問題(例子:2008金融海嘯),政府管治有問題(例子:貧富差距擴大,財富分佈不均),市場失敗(例子:貿易戰,樓價不斷上升),還有,民主選舉失靈(例子:用選票趕走一批,迎來另一批極端民粹政客)。(按:例子係左丁山提供)
七十幾年前已有不少人討論上述種種,結論係馬克思主義應該可以治療資本主義百病,二次大戰前後劍橋大學有不少教授左傾,甚至甘願為蘇聯做特務,就係相信馬克思主義係人類前途希望。但事實勝於雄辯,自1950年到目前為止,信奉及推行馬克思主義嘅國家大概只有古巴與北韓,同是窮國,至於俄羅斯與中國,早已拋棄馬克思,改行資本主義市場制度,經濟先至得到發展,中國更加懂得讓人民先富起來(鄧小平偉大在此)嘅道理,1978、1979年間就推行農村改革,「包產到戶」,徹底放棄人民公社,再開放工廠讓香港廠商來料加工(即利用當時低工資低地價),讓香江廠商「剝削」內地,大發其財,然後幫助民企成立,與國家企業互補,呢類在馬克思眼中「剝削」勞工嘅政策美其名曰「中國特色社會主義」,一於掩耳盜鈴,用資本主義擴大市場,爭取盈利,培養出世界級企業家如馬雲、馬化騰、郭廣昌、王健林等等,呢班大富豪相信馬克思主義個屁!佢地實行馬克思嗰套就唔會發達啦!今時今日陸小姐稱讚習近平主導嘅「中國模式」(即中共專政領導指揮之資本主義),叫香港反思學習,唔怪得令中環人嚇了一跳,陸小姐素來生活舒適,還是走回自己嘅Loft享受法國情調生活更加好!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載