› 選擇地區
三藩市
紐約
洛杉磯
其他美國地區
香港 台灣 北美
 
2018年07月03日

香港資產有價 - 左丁山

行銷A兒子因味精敏感,要由學校送去威爾斯急症室,事後問左丁山有冇皮膚專家介紹,因醫院實在太多人,睇街症好唔掂。左丁山最怕介紹醫生,因責任太大,唔想有心理負擔,記者小G聞訊,即刻上網搵到一啲中環名醫,但名醫診金由一千至三千元,長睇十分重皮,做老竇嘅分分鐘會因此而產生銀紙敏感症。
啱啱股票資深經紀請左丁山去南豐大廈地庫之「香港老飯店」吃午飯;梁老闆夠晒勤力,在門口招呼經紀C呢位熟客,仲替我倆寫埋菜㖭,唔怪得「老飯店」有咁多熟客,做餐廳真係力不到不為財也。經紀C原來識得皮膚醫生,但近年因為做美容護膚更加好搵,已無興趣睇皮膚病之奇難雜症。一啲美容院好難請到有牌醫生駐場,故此兼職乘運而興,醫生老友一收到美容院有job order,就會去美容院以有牌醫生身份開工、收銀,所有儀器、租金、助手,皆由美容院負責,醫生做完工夫就鬆人,搵銀比睇症更輕鬆。唔怪之得公立醫院成為熟手技工「培育所」,有咁上下年資嘅專科醫生,隨時受到外間搵真銀之誘惑也。
經紀C其實已經從大行退休,不過佢自問年紀輕輕未讀完中學就入行,見證72至74年之股市大起大跌,由千七點跌到百五點,之後身經百戰,由後勤部門點股票,送股票做起,得鬼佬上司睇起(勤力快捷,肯任勞任怨,慢慢就有人欣賞),調佢入盤房學習買賣股票技術,卒成為大經紀,為不少大戶買賣、沽貨。
呢日午飯同佢懷舊,佢話佢呢類人已經絕種,現在啲公司不論邊行都只睇沙紙,唔會畀機會中學生由低做起,升上做Trading Desk主管嘅咯!經紀C現在受同行老友邀請,做番經紀本行,睇住一啲老客戶戶口,過吓日辰;講番舊事,佢話最有深刻回憶嘅係九倉爭奪戰,怡富大戰獲多利,怡富自不然係代表怡和集團,獲多利代表包玉剛集團,結果係怡富成功迫使包Sir以高價買入股票,令怡和賺到笑,而包Sir獲得九倉控制權之後,捱價捱足近十年。但將近40年後,時至今日最後笑得最甜嘅,還是包氏家族及九龍倉股東,淨係廣東道嘅商場與大廈,你話值幾多錢?相反當年開始得知鄧小平堅持收回香港後,賣山頂地皮,賣九倉,賣港燈,賣香港電話嘅怡和集團,大大話話唔見咗幾千億(即係賺少咗)。經紀C話:「唉,人無水晶球,點知咁多後事,我在股市打滾40年,只知香港資產長揸有着數。」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載