› 選擇地區
三藩市
紐約
洛杉磯
其他美國地區
香港 台灣 北美
 
2018年07月23日

穿短褲不准入內 - 左丁山

Twitter圖片

定期飯局輪到財務L做東,以前大家以吃便飯傾偈為主,並不重視美食,點知今次財務L請去國福樓,比平時高一級。中區美利大廈已由九龍倉集團收購,內部裝修大改,成為五星豪華酒店,在平台一間小平房則改為星級中菜廳,搵到原本在灣仔皇悅酒店地庫嘅「國福樓」入駐,國福樓則是福臨門分支,菜式相差不遠。
是晚左丁山由中環行過去,路程不太遠,仲係第一個到埗㖭。一個人坐低,望吓張菜單,吓,乜咁隆重,有燒乳豬、高湯翅、鵝掌遼參、炆斑翅、炸子雞等,要財務L做東,點好意思,唔通有大喜事發生?五分鐘後,財務L翩然而至,即刻問佢何以如此隆重?財務L笑言:「不久之前,我娶咗新抱,因新抱祖母已年逾九十,一家住在溫哥華,所以我地全家飛咗去溫哥華擺酒,喺香港就唔麻煩老友嘞,分幾次請不同朋友吃餐飯就算!」
財務L認真客氣,事先又唔講明,我地冇買禮券賀佢㖭。幾位老友好快到齊,唯獨公職W還在九龍開會,聽講畀示威者包圍,要應承唔加租先至肯放佢走,咁搞法,幾點先至可以嚟到中環?於是財務L話食住等,誰知會計A在門外入唔到嚟,因乜事呀,走出去問吓,哈,原來國福樓算係五星酒店一部份,穿短褲不能入餐廳,會計A近年如果去Hong Kong Club食飯就穿西裝啫,平時夏天男士一概穿短褲T恤;佢話從來唔知道中餐廳有dress code嘅噃!好彩財務L係國福樓常客,人人識得佢,經一番商議,卒之談判達成共識,設特別安排,等會計A可以同我地一齊舉杯祝賀財務L有新翁之喜!
開飯前,財務L公子與新婚太太特別在去另一個約會之前,來到與幾位世叔伯打個招呼,一望,果然郎才女貌,兩人同在歐資銀行財富管理部門工作,前途無限,再望真吓,原來L公子20年前係與肥仔K一齊加入一個遊學團,係美國讀過暑期班嘅同學嚟嘅。L公子與太太拜拜之後,大家高談闊論,左丁山提出朋友遊北京後所見之「怪事」,包括中央電視台報導新聞之時,突現黑影,基層住宅區全部要放下習像,不准懸掛,人民日報頭版有一日不報導習新聞,新華社突然刊出華國鋒道歉嘅陳年舊事等等,是否習大大受到質疑、挑戰呢?會計A與財務L分析下,皆認為純屬fake news,習權威難受挑戰!投資K就認為香港股市股票供應太多,新股上市源源不絕,指數難大升,今年下跌機會較大!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載