› 選擇地區
三藩市
紐約
洛杉磯
其他美國地區
香港 台灣 北美
 
2018年08月07日

大老闆巡餐廳 - 左丁山

《飲食男女》圖片

幾乎係半個虎媽(或者係獅媽,因為佢嘅英文名係C字頭)嘅C媽媽搵左丁山食午飯,臨時約會,去邊度好?C媽話佢當日在九龍活動,於是就去咗尖東帝苑酒店嘅日本餐廳四季菊Shikigiku,左丁山其實一早約咗財務L在星期四去IFC四季菊嘅,本想叫C媽去Sabatini,但佢話忽然想食一大碗魚生飯,要到四季菊先有得食,唯有就佢啦。嗰碗魚生飯果然好大碗,鋪滿刺身,連拖羅也有一兩件,C媽又講明唔食蝦,唔要三文魚,於是食得相當滿意。食完埋單,點知後面有人叫一聲,回頭一望,竟然係郭大公子W哥親自巡餐廳,佢在四樓食完意大利菜,走落一樓睇吓日本菜,打招呼之後,W哥又介紹二樓J's Bar好正,叫左丁山得閒去飲番杯。如此大老闆咁親力親為,既要管億萬地產生意,仲要理埋帝苑酒店之餐飲,唔怪得啲高層員工好鬼落力,好似酒店總經理Jenny咁,好似只係識返工,唔識放工咁款,依家明白帝苑酒店餐飲點解受歡迎,門口餅店每日下午有人龍買蝴蝶酥嘞!既然W哥大力推薦J's Bar,下次新亞校友會主辦每月一次嘅校友黃昏Happy Hour聚會,叫會長Anthony問吓價先,啱中大年青在職校友消費嘅話,可以到帝苑J's Bar happy一次。
C媽好緊張個仔嘅學業,香港家長最緊張英文,佢亦不例外,有位英國人老師為兒子補習,兒子聽老師所言,在無溫習,不備課情況之下,去報考(網上)之CAT4(Cognitive Abilities Test),CAT4係畀6-17歲學生考嘅,C仔今年8歲,在毫無預備情況下,考到高分,評語係:「有87%機會達到預期水平」,即係乜意思呢?C媽話,根據英國人老師講,C仔如果今日就去英國寄宿學校TOP 30就讀,有八成七機會達到寄宿學校之英文標準水平,好為C仔高興!CAT4試就係英國寄宿學校嘅入學試一種。C仔兩位表哥就考到排名第一嘅Westminster,跟住入咗牛津劍橋。左丁山特登講「係你個公子優質吖還是英國人老師補習有功呢?」C媽不以為意:「兩樣都有啲啦,可惜呢位老師私家補習生意太好,住在港島西豪宅,新學年唔肯過海到九龍為我個仔補習呀!」講講吓,佢再透露多啲,補習老師去年有兩位學生考到英國Harrow(排名第十)在家長界引起小轟動。上市公司主席爭住要佢為啲王子/公主補習英文,C媽呢類本地中高產邊度夠強國人有錢父母爭吖。補習老師臨別贈言,叫C媽禁止兒子玩iPhone、iPad上網,最緊要就係手執書本,勤於閱讀!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載