蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月13日

倒馬會米 - 左丁山

22,884

三年前編輯B捉左丁山加入一個賽馬團體,卒之上一季幸運中籤,可以在今季(2018 /19)運馬來港作賽。編輯B身為團體經理人,召集一眾成員到上海總會吃午飯兼開會,討論去邊度買馬、如何買馬、買馬預算、將來擺隻馬入邊個馬房等等。成員之中,只得兩三個唔到,其他人齊集,有會計師、律師、醫生、證券界高層與成功商人等等,剛好係馬會會員典型樣本之反映。
正經事好快講完,一致通過,交由編輯B去跟進執行,鬼叫佢係經理人乎?做賽馬團體之經理人,要兼顧好多事情,管錢又要均真,直情係苦差,好彩編輯B已自前線崗位退下來,比其他人更有時間,唔怕捱義氣啫。開會完畢,大家高談闊論,成員之中輩份最高嘅係體育界大老會長P,會長P每季都中三T,9月5日夜馬三T,佢中咗八隻馬,只係唔中一隻熱門馬「塑料喜」,佢講起都呻笨,話一時匆忙,唔記得咗呢隻馬。佢嘅得意傑作係上季一次夜馬,佢去北京道食飯,之前經過投注站就走入去買三T,其中一張飛填好之後,突然見到馬經有「大收成」呢隻馬,99倍,馬主係識得嘅,於是補填多一隻馬,咁就中咗六百幾萬!左丁山問佢有乜秘訣,會長P話,「你學唔到嘅嘞,我時時大包圍,注碼不少。」咁又係,左丁山每次買三T係動用128元,想中就要上天庇佑。
大家夾錢買馬做馬主,自不然係馬場常客,講起今季季初賽事,報名馬匹不甚踴躍,好可能係與休息時間未夠有關,因為7月15日馬季結束,9月2日馬季開始,不少馬匹根本未進入競賽狀態,故此一啲唞夠嘅舊馬出完又出,希望季初贏番一兩場,蔡約翰至今按兵不動,呢個時候吼住華人馬房有着數。
又有人留意到,今季馬場一啲地方少咗自動投注機,原因不明。馬主N與F在今季第一日賽馬,如常坐在凱旋廳,唔見咗三部投注機,搞到櫃枱投注窗前排長龍,馬主N行遲咗仲落注唔到㖭;馬主N無論日馬夜馬都長駐會所凱旋廳,知得最清楚,唔怪得9月2日入場馬迷人數創新高,投注額反而跌咗約3%。肥仔K話:「你學習用電話App下注啦。」鬼唔知咩,老馬迷多數鍾意填飛(睇投注站就知),用電話App要記密碼又要啱次序,唔係人人都眼明手快嘅,下命令拆除搬走投注機之人,實在堅離地,倒馬會米!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載