› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

中文系形象 - 左丁山

香港中文大學網站截圖(互聯網)

昨日本欄講及「遵理」寫中文補習先生賣廣告,並無意思針對任何人,只係想指出當今中學生讀書之現實及實用性啫。廣告內有補習先生之範文,字體好細,辛苦讀咗幾篇,唔,中文大學中文系教授何志華如果堂上有收到呢類「寫作功課」,大有修改空間。何志華教授每年為中文大學之榮譽博士、院士撰寫讚詞,功力深厚。文筆了得,優雅流暢之餘,又能一矢中的,言簡意賅,將當事人之人生歷程、社會貢獻,一一呈現,令人知道點解當事人值得獲頒中大榮譽,真高手也。中大中文學士碩士,有意從事補習行業,晉身天王級,得到金錢報酬十倍百倍於何志華教授年薪嘅,不妨多讀何教授手筆嘅讚詞,先至去教中學生作文。
講到上網,順手Google中文大學中文系,搜尋教師成員,咦,網頁好新潮噃,每位教員都有圖片,不少較年青副教授、助理教授、高級講師、講師等等嘅照片,尤其漂亮,presentation與補習學校為補習先生賣廣告差唔多,唔通中文系嘅形象一向係老餅,故此中大中文系網頁力求update、現代化、社交網站化?講真,又係幾吸引眼球嘅。八卦起嚟,又搵埋中大歷史系教員網頁,嘩,夠晒傳統,一大堆文字介紹,圖片欠奉,果然係學府風範,想不到中大中文系與歷史系對於marketing意識方面,有咁大差距也。
左丁山都係老咯,諗唔到中文系之「教師包裝」可以咁追上時代,心目中之中文系仍然停留在前新亞中文系老師如潘重規、程兆熊、曾克耑等人物。比較時代性之中文系形象係見到榮休講座教授張洪年呢位新亞師兄,佢係語言學權威,在柏克萊教書,提早退休回港到科大,後返中大任教,七十歲咯,仍然頭髮濃黑,一隻耳仔戴耳環,着牛仔褲,左丁山笑過佢係二十一世紀之中文系教授形象代表!
中大九間書院之中,新亞畀人嘅形象係比較老派,老派也有老派好處,堅持傳統文化,推廣文史哲。剛接新亞書院電郵,2018/19年度新亞書院文化講座,第一講在10月20日星期六下午四時在農圃道新亞中學禮堂(經合一道校門進入)舉行,由73年歷史系校友陳萬雄博士(前商務印書館董事總經理)演講:「由區域大地理談中國大歷史,從蒙古高原說起」,以粵語講述,歡迎各界人士到場聽講。陳博士主修歷史,在新亞時期追隨幾位大師如全漢昇、牟潤孫、嚴耕望、王德昭、孫國棟等人學習,學有專長,現在有一股潮流,從地理及地緣研究宏觀歷史,陳博士講述,教中史之老師尤應出席聽講!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載