› 選擇地區
三藩市
紐約
洛杉磯
其他美國地區
香港 台灣 北美
 
2018年10月01日

香港興業 - 左丁山

香港興業國際(上市編號480)係一間十分低調嘅公司,並非一個股民會留意。中秋假期之前,一位財經演員係左丁山世姪,在沙田馬會銀袋咖啡室遇到,佢問左丁山:「識唔識480?」時興淨係講號碼,左丁山要諗咗一陣先至記得番,咪係香港興業囉。世姪話現時股市波動,老細叫佢研究吓一啲沉靜股份,睇吓有無隱形黃金,掘番兩三隻,低價買入,長期持有等發達(例如私有化或另有公司敵意收購之類)。想法就漂亮嘞,隱形股寶去邊度搵?世姪話:「我有老友叫我中秋節入愉景灣賞月,於是醒起愉景灣地主叫做香港興業,搵番啲資料睇番,近日股價在三個八毫半至三個八毫七左右浮動,市盈率低至2.4倍,市賬率0.29,52周高低位係3.78至4.773,目前價就接近52周低價,有冇咁筍呀,一百元淨資產,29元賣畀你?標準敵意收購或私有化對象也,你認為點呢?你以前做銀行識唔識呢間公司?」
算世姪夠運,問啱人。左丁山在1976年已經知道呢間公司啦,當年一位上海人王永祥先生買入整個愉景灣,向莫斯科Moscow Narodny Bank新加坡分行貸款,嗰陣係東西方冷戰時期,香港商人向蘇聯借錢,當然引起英國注意,後來王先生周轉不靈,愉景灣地皮成為銀主盤,莫斯科銀行想乘機沒收,港英即刻叫咪住,叫滙豐安排本港商人買入,後來就係查濟民家族掌控全部股權。目前香港最記得清楚呢件事來龍去脈嘅就係鍾逸傑,可惜佢唔肯寫回憶錄呢。
左丁山任職之銀行,嗰陣時與香港興業及主事人查大公子懋聲有少少來往,上司與查大公子尤其熟絡。在查家管理下,愉景灣穩步發展,至今近40年咯,愉景灣已成為外國人生活區。剛啱近日與當今話事人查二公子懋成見過面,記得佢話愉景灣居民有36種國籍,講18種語言,係聯合國之縮影,大部份居民係租客,收租業主當然係本地人啦!佢講完,左丁山就想起,新亞師兄James自加拿大回港搵地方住,希望住在愉景灣,左丁山叫佢搵愉景灣一個大業主王文彥,果然立即搞掂,James話依家住得相當愉快,享受美景喎。
查先生話香港興業在愉景灣有地650公頃,在內地及曼谷擁有一千萬平方呎土地儲備,可以長期發展,興業在曼谷之「旗艦」當然係素可泰酒店(Sukhothai),朱古力下午茶自助餐係到曼谷必然之選(呢間酒店係左丁山所屬投資公司約30年前賣畀興業嘅),查生話上海最新開幕之「興業太古滙」內有一間素可泰,開幕後好受歡迎,叫左丁山得閒去上海住吓。左丁山靈機一觸,問佢:「你地會唔會私有化㗎?」Victor唔係Tesla嘅馬斯克,畀左丁山一個穩妥答案:No comment。
(按:大記者通知,佢母校東院道官立小學會在11月29日於九龍始創中心譽宴舉行60周年鑽禧校慶聚餐,歡迎校友報名。該小學名人輩出,馮紹波、彭玉榮、霍泰輝、馬豪輝、湯家驊、胡經昌等等。還有一位老師叫做何萬森!)

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載