› 選擇地區
三藩市
紐約
洛杉磯
其他美國地區
香港 台灣 北美
 
2018年10月12日

外媒懷疑某人出手 - 左丁山

特區政府不發工作簽證予《金融時報》亞洲新聞編輯馬凱(Victor Mallet),變相將佢驅逐出境,震動國際傳媒界。呢位馬凱先生係資深記者,亞洲之外國新聞特派員及記者無不認識之,佢曾出席達沃斯世界經濟論壇,與習近平先後發表演講,並非美國記者砵典乍駐北京時還是年青小伙子一名。咁有份量嘅記者畀香港特區政府以「無須解釋」之莫須有罪名趕扯,盲嘅都睇得出係與FCC邀請陳浩天演講一事有關啦。馬凱其實只係代表FCC做演講會主持人啫,何罪之有,依家搵佢做代罪羔羊(其實完全冇觸犯香港任何一條法律),由佢食死貓,意義就係警告整個FCC及FCC理事會,FCC記者自然變得兔死狐悲,有乜辦法唔群起而抗議之,國際傳媒紛紛指香港言論自由大倒退,香港國際形象大損。
幾位居港多年嘅美國朋友為之感到震驚,到英文報紙網頁留言,支持馬凱,唔怪得後來美國商會大概有感於美國商界有強烈反應,亦發表聲明表示不安。餐廳R來電詢問一個香港英文新聞網站HKFP有評論員講到整件事係CY在幕後導演,有意為難CL嘅喎,真唔真?唉,呢啲事邊度有得稽考㗎,不過CY與CL冇偈傾,就有好多人間接證實。全國政協L日前與我地吃午飯,講到CY與CL,就話親眼見過一次中午飯局場合,CY與CL同坐在主人家左右兩旁,全場零交談,冇互望對方,令好多在場賓客背後私議,點都係前上司下屬嘅關係,何解搞到咁僵?
有一說係指CY有意在2020年復出,參加特首角逐大賽(信報余錦賢曾提及),有意製造對自己有利嘅政治氣候條件,例如港獨,二十三條立法等,逼CL埋牆角捱打。是耶非耶,難以了解,但憑蛛絲馬迹睇,林鄭一向對FCC印象唔錯,比較重視國際媒體筆下之香港形象,而陳浩天演講一事,案發前無人理會,係CY主動發帖文及將件事谷大到愛國派起動嘅,事後聲稱要競投租約(即變相趕FCC離開雪廠街會址),又係CY言論鼓動嘅;凡此種種,都令人懷疑趕走馬凱並非林鄭之意,而係啲有力人士說服北京下令!還有呢,趁山竹後遺症未清除,有才女為文嘲諷林鄭「何不食肉糜」,都令人產生一個印象,CY陣營步步進逼林鄭。之不過,一個人做咗國家領導人級數,點樣可以返落嚟做地區首長,連譚耀宗都話無乜可能,既然如此,退下就裸退啦,何苦還要諸事加把口!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載