› 選擇地區
三藩市
紐約
洛杉磯
其他美國地區
香港 台灣 北美
 
2018年10月25日

敵意收購高息REIT - 左丁山

單偉健

前一輪睇到有報紙頭版廣告:致:春泉地產信託基金單位持有人……呢類財經廣告,內容沉悶,全是金融術語,普通讀者一定冇心機睇,就算好奇而睇吓,亦會睇到一嚿雲,唔會明白。呢類廣告,左丁山三十幾年前起草時,要同律師傾好多次,再三修改,先至可以發稿。依家呢,除非有關自己利益,一定唔會睇。

點知揸住一啲REIT(地產信託基金)收息嘅沙田陳太突然來電問:「你知唔知道乜嘢係春泉信託?」我唔知嘅?考起,自己住得背,亦未聽過,亦無興趣追查。但蘋果日報財經版在8月16日有料到喎,一篇短文講大基金恩怨,提及「太盟」敵意收購「春泉」嘅基金。「太盟」嘅大舵手叫做單偉建,引起左丁山八卦心態,中大崇基學院有一位知名校友單偉豹,佢嘅細佬單偉彪,都係建造界名人,呢位單偉建唔通係佢嘅三弟?畢竟單不是大姓吖嘛。於是打電話問幾個中環人,佢哋話非也,呢位單偉建係內地人,係海歸派。於是上網一查,係噃,此君畢業於對外經濟貿易大學。舊金山大學MBA,柏克萊博士,做過世界銀行,華頓學院教授,來頭好猛啫,其他唔使再講咯,總之係海歸派知名ibanker及基金名人。

如此精通財政嘅猛虎,竟然不請自來,一聲唔該事先毫無風聲就搵UBS(瑞銀)做財務顧問去狙擊日本人控制及管理(蘋果日報資料)嘅春泉(Spring REIT),自然係鳳凰無寶不落。於是第一次翻查呢間春泉嘅資料,有乜咁吸引,令大鱷垂涎呀?一睇,原來道理幾簡單,呢隻1426嘅52周高低價係4.3至2.09,五十天平均線係3.481,UBS出廣告後,十天平均價係3.94,皆因要約(offer)出價4.83,比9月24日收市價3.00高出61.7%。消息出咗之後,春泉信託單位價急升,10月16日收市報3.6,息率6.13%,市賬率0.619。換言之,太盟基金係趁股市大跌,REITs板塊因利率上揚而下跌嘅時候,吼準時機獵食,本來每單位3元,以4.85元收購全部單位,可以賺到乜?咁就要睇吓春泉有乜資產。蘋果日報指春泉在北京中心區有兩幢優質物業,收租穩定。左丁山再問吓人,熟悉北京嘅朋友話,春泉其實幾似冠君2778,冠君有花園道3號及朗豪坊,係人都知係靚物業,春泉在北京亦有兩幢類似商業大樓,過去每單位派息0.236,作價3.00元時,息率有7.86厘,當時唔識,唔買走晒寶,依家睇太盟一定係收齊所有信託單位之後就將春泉退市(Delist),然後拆骨,以市價分售兩幢大廈,賺其資產衍生價值;或者當作平價買入兩幢優質大廈,作長期收租唔駛分畀小股東,於是小股東出售單位就有即時收益,但失去長期高息!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載