› 選擇地區
三藩市
紐約
洛杉磯
其他美國地區
香港 台灣 北美
 
2018年11月18日

校友歡樂時光 - 左丁山

中大新亞書院校友會應屆會長安東尼係99年畢業生,主修IT。一早創業做咗老闆,專搞電腦設計,印刷設計及活動管理等等。呢類人多數係extrovert(外向人物),最鍾意透過搞活動來擴大社交網絡。

校友會梗係要由呢類人主理啦,否則就會暮氣沉沉。安東尼上台後,諗到一個節目,就係在中上環、銅鑼灣、尖沙嘴等方便地方,每月搞一次Happy Hour,由校友會訂地方安排細節,參加校友去到酒吧,自己叫酒飲叫嘢食,各自付鈔,豪情者可以一次使三幾百,慳錢者可只飲一杯飲品,正是豐儉由人。

左丁山一聽,又發揮理財本性:「喂,校友會要唔要包場呀,酒吧餐廳一定有最低消費額,唔夠人到場或有人到但花費少少,咪要校友會包底,蝕到喊?」安東尼話:「大師兄唔使驚,現時年青行政人員都會飲兩三個drinks,吃小食嘅,次次都係起碼三十人,校友會未蝕過本。」點樣叫人嚟呢?安東尼講:「唔使叫嘅,一將消息post上新亞校友會fb,就有人報名,不止新亞人,中大各書院校友都會聞風而至,香港大學朋友都試過走來參加,呢款活動最適合商界校友,MT,Officer以至經理級以上一代,你咁嘅大仙就少啲。年輕行政人員需要擴大社交網絡,盡量識多啲人,畢業後淨係同同班同系同學來往,好蝕底嘅。」

此言正確,尤其是在商界金融界等上位嘅大學畢業生,都需要有此概念,現在流行一句話:「識人好過識字」,雖然誇張一啲,你唔識字就冇人願意識你,大前提係先識字,後識人,識人愈多愈好,初出社會做事,冇乜好得過加入校友活動,認識師兄師姐師妹師弟,擴大社交圈子,不願參加者,要不是introvert就是家底厚,唔使識人。

咁下次happy hour去邊度搞呢?安東尼話想在11月29日晚上七至九時去怡和大廈地庫嘅Grappa's Cellar,鍾意佢地點適中,價錢唔貴,地方夠大,問左丁山有冇把握卜到地方。咁就真係識人好過識字,左丁山梗係搞掂啦,兩個電話就同佢安排好,仲請埋佢去Cellar食午餐($190),又幾正喎,抵食之至,但上座率只有三成,問經理點解呀?經理話:「近年顧客有結構性改變,幾間西人公司搬咗去長沙灣,寫字樓由強國人、韓國人、日本人搬入,佢哋比較少食西餐,所以午市較弱。好彩晚市夠旺,不少公司包場,十一月底開始,簡直做唔切。」洋人搬去西九龍慳租,東方人進駐中環名廈,西方人要慳錢,東方人要面子,不惜腰間錢!在中環做餐廳,需要應對新客戶組合,迎合新需求!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載