› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

鄭大班拜拜香港返溫哥華 - 左丁山

多時不見之鄭大班阿爾拔忽然來電約吃午飯,屬即興約會,要是別人如此要求,必定婉拒之。但阿爾拔素來聲大夾惡,話唔食唔得,問佢原因,佢話:「我走喇,見吓面得唔得!」呢排聽見個「走」字,都有啲心驚,高錕,郭炳湘,周明權,鄒文懷,查良鏞等逐個離開,戊戌年變化何其多也。
於是星期三就要咗PP天一,大班仲搵到陶傑與死黨KT,一齊飲茶。問大班走去邊呢?大班話:「鐵定一月一日返溫哥華定居,與香港講拜拜。」大班早年在九龍工業中學讀完書,做幾年嘢之後,已移民加拿大,成為飛機維修工程師,八十年代中加入星島報業集團,回港負責市場拓展業務,於是改變了一生,從一個比較沉悶嘅飛機維修工作搖身一變成為傳媒界名人物,商台皇牌主持,立法會直選議員以及曾特首密友,轉變之大,之快,相信大班自己也不敢相信。目前教育潮流有一樣嘢叫做生涯規劃,其實人生有好多不可預測之變幻,無可規劃,鄭大班就係一個好例子。四十年間從一個溫哥華移民小子變成香港山頂豪宅主人,大名遠播,而今燦爛歸於平淡,返回溫哥華過平淡退休生活,呢幾十年生涯,邊度有得規劃㗎?食住個浪,隨機應變,見招拆招而已。
左丁山之認識鄭大班,約在八十年代中,當時佢替星島攞到當紅美國雜誌Playboy之中文版權,點知胡仙女士身為女性,最後反對出版花花公子,大班認為此乃千載一時商機,搵到廣告公司支持,廣告公司老闆又搵到朋友Adriaan Zecha支持,Zecha先生除咗係著名麗晶酒店(Regent)創辦人之一外,還是出版界知名人物,與梅鐸曾是合作夥伴,有佢出面,大班順利取得Playboy之中文版權,於是在灣仔開公司進軍出版界,Playboy第一期之香港小組鄭文雅寫真集轟動全港,賣到斷市,鄭大班於是一炮而紅。Zecha先生亦是左丁山打工之私募基金公司之董事,佢唔識中文,叫左丁山幫手睇住份中文花花公子雜誌辦得如何,於是左丁山奉旨去灣仔睇靚相!大班又醒,搵到兩位名筆幫忙,信報張寬義每日中午先到花花公子睇稿然後先至返信報,星島晚報吳仲賢就在晚報下午一時出版後,上到出版社搞編務,左丁山有時得閒望吓望吓,除咗睇相之外,又學到唔少寫稿技術,張寬義筆名楊八妹,名震中環,佢間中教左丁山兩招,至今受用無窮。三十餘年眨眼即過,謹祝未來三十年鄭大班闔家安康,在溫哥華繼續快樂似神仙。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載