› 選擇地區
三藩市
紐約
洛杉磯
其他美國地區
香港 台灣 北美
 
2018年12月16日

香港人不要病 - 左丁山

朋友M最近睇到星島日報報導公立醫院眼科醫生「大逃亡」,不少資深醫生辭職走去私家診所。朋友去過亞皆老街香港眼科醫院睇眼,搞咗兩個幾小時先至可以鬆人,已過午飯時間。對呢位中環老友嚟講,睇眼科要搞兩個幾小時,真攞命。佢本來等到撞火,但又見到一位與中文大學關係密切嘅退休大賓架亦在呆等,於是降番啲火氣。左丁山話:「眼科醫院好似日日排大隊,你輪兩小時咪好快囉!」朋友M話:「我係睇私家症呀,到眼科醫院三樓睇中文大學眼科教授,唔係在地下公立眼科排隊!」哦,咁又真係冇法,過往林順潮在眼科醫院睇私家症時,分分鐘要等兩三個鐘頭,內裏名人如雲,大家鬥耐性,現時林教授在中建大廈搵真銀(上市公司主席),到眼科醫院睇私家症,已經快咗一啲嘅啦。

朋友M好奇之下,上網搜尋市民百姓睇專科之輪候時間表,醫管局幾透明,唔怕人批評,有各專科輪候時間──耳鼻喉科:緊急新症,少於一星期,半緊急新症5至6星期,穩定新症56至78個星期,最長89星期(九龍東),時間係計中位數。眼科:穩定新症44至97個星期,最長169個星期(九龍東)。精神科:穩定新症25至63星期,最長134星期(九龍東)。

睇到呢個數字,朋友M已經冇心機再搵落去,唉一聲:「住在九龍東,要到公立醫院睇專科都幾難。」如果真係睇公立醫院醫生,最好唔住九龍東,可惜好多人冇得揀,公屋住客於是坐困愁城,冇得郁。

想知道醫院輪候時間情況,去探吓病就知,醫生C帶咗姪仔去伊利沙伯醫院探佢親戚病,親戚係公務員,入公立醫院,跡近免費,故此入咗伊利沙伯醫院。醫生C 20年前在伊利沙伯做實習醫生,幾年之後就離開咗,上星期重遊故地,發覺情況二十年不變,可能仲變差咗,病房擠逼,病床加完又加,醫生護士行路要側身,忙到氣呼呼,面色自然唔好。好難怪嘅,如此氣氛下,醫護人員亦係凡人,心煩氣躁亦屬人之常情。姪仔突然見到另一張病床上嘅一個老病人之心跳監察器之數字逐漸下降,慢慢跌到去20,捉住阿叔問:「點解跳得咁慢嘅?」醫生C連忙帶佢離開,行遠啲。而即刻有護士趕至,將病床拉起布簾圍住。醫生C於是帶姪仔離開,費事阻住人地處理老病人後事,伊院一位年輕醫生姓梁,曾經在fb帖文悲嘆:「香港人不要老,不要病!」香港如此缺乏醫生護士醫院,林鄭特首唔該諗諗辦法!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載