› 選擇地區
三藩市
紐約
洛杉磯
其他美國地區
香港 台灣 北美
 
2018年12月18日

科技發達貧富不均 - 左丁山

去睇眼科覆診,照例等足兩個鐘頭以上,想唔睇手機新聞都難以消磨時間。喺香港睇病,無論大富小康,係「機會成本」昂貴之事情,再加埋醫藥費診金,更加肉痛。

睇到金融時報(12月11日)一段新聞,都幾有趣,就係講以色列高科技產業愈發達,貧富愈發不均,大部份人更加怨氣重。以色列人即是絕大部份係猶太人,猶太人素來頭腦精明,IQ過人,對研究理論及科技,絕對唔會輸蝕,故此以色列處於天氣乾旱,但近沙漠地段居然有農業產品、花,出口到歐洲,唔到你唔服。潮流興IT,矽谷稱霸天下喎,以色列有樣學樣,急起直追,吸引大量世界資金投資,當年董特首去視察,返嚟就搞出一個數碼港,時維1998-1999年間。但近二十年來,香港科技產業對GDP有何貢獻呢?左丁山都唔記得。金融時報就話1995年,以色列GDP之中,科技業佔6%,至2017年,呢個比例已經增加一倍至12%,增速可謂驚人。

於是大城市台拉維夫城市面貌有大轉變,新型住宅大樓不斷出現,每單位售價高達一百萬美元或以上,而以色列全國工資平均數係每月2800美元,邊個住得起呢啲新豪宅?咪係IT新貴、科技工程師、新創業成功嘅年輕人囉,呢類人平均月薪係一萬美元,比普通人多三倍半,已成為以色列天之驕子。

不過呢類人始終係人口嘅少數,又因為拆舊樓興建新型豪宅,不少傳統手工藝小店、老店紛紛執笠(呢樣嘢香港見得多),令傳統人士大為不滿,讀文學社會科學嘅畢業生更是失落,一間老舖老闆話形勢比人強,於是趁好價賣掉老舖,攞番一筆供兒子入大學,讀邊科呢?估中冇獎,就係讀工程科目吖嘛,仲去讀歷史文學咩!

投資銀行界從業員收入豐厚,倫敦、紐約更甚,故此紐倫港三地都係財富分佈不均嘅地方,美國矽谷嘅貧富不均更誇張,搞到三藩市居民向接載Google員工返工嘅巴士擲石。香港現在大搞IT科創,隔籬深圳已成為中國最新科技工業城市,經濟動力會帶動香港科創業與深圳合流。科學園現在有一萬二千人返工,將來如果成功,金融加科技會令到香港更加貧富不均,隨時會引發法國式黃背心危機,林鄭特首咁醒目,唔該猛講科創之餘,諗多一步。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載