› 選擇地區
三藩市
紐約
洛杉磯
其他美國地區
香港 台灣 北美
 
2019年01月03日

比較人權 - 左丁山

原圖:法新社(法新社)

上到陸羽,見到加燦T,問佢幾時返嚟㗎?T先生話:「上個星期。下星期就返去多倫多嘞,辦啲小事情箒。」T先生經常自稱加燦,話下半生就係與阿燦為伍,八十年代入過大陸做事,叫內地人為阿燦,後來形勢有變,急急移民加拿大,在那邊無事可做,自嘲變成阿燦,又稱加燦;點知後來得閒無事,與朋友參加一個王亭之講壇,根本聽唔明,鬆人之際,王亭之拍佢膊頭話:「兄台,與你有啲緣份,你不如畀個八字我,我得閒同你算一算。」加燦T為之愕然,畀咪畀囉,於是寫下姓名、電話、出生年月日時,說聲再見而去。兩個月後,王亭之來電約談,攤開紫微斗數命盤,一談就是三小時,加燦T聽得似明似唔明,只係記得一句:「千禧年後,你會北上發展。」加燦T駁嘴:「北上就到PEI(愛德華太子島),捉龍蝦?」王亭之解釋:「按你出生地計呀,北上就是中國北方啦。」

加燦T大笑而去,不以為意。誰知到咗2000年,真係有人高薪禮聘佢去遼寧管一家公司,於是一去十幾年,仲畀內地人在背後笑佢係港燦!加燦T話王亭之算佢條命,有準有唔準,但批佢「北上」,就真係神奇過神奇。

依家都老咯,返到多倫多更無甚搞作,日常與朋友之熱烈話題就係孟晚舟在溫哥華。佢好同意信報一位專欄作家章可怡嘅觀察,中國抗議加拿大違反人權係大笑話,笑死香港移民(但中國新移民就有不同講法),因為中國拘留三名加拿大人,不知拘留在何方,唔見提堂審訊,冇律師代表,一切黑箱作業,突然間宣佈釋放一名加拿大女教師,又係任佢講。反之,孟晚舟在溫哥華有齊法律保護,公開上庭,由加拿大律師代表,雄辯滔滔,法官准佢保釋,返回豪宅居住,在溫哥華雖受監視,日常出外生活享受,飲茶與平常人無異,加燦T話:「孟女士咁有錢,現在有最佳藉口唔駛返深圳,他日打引渡官司,有最好嘅加拿大律師代表,包保可以打幾年,我好驚孟女士在溫哥華住到樂不思蜀,好似我𠵱家咁,歸屬楓葉國呀!」中國與加拿大比較人權,差天共地,真係唔好講笑,梁美芬在城大教學生,唔知會唔會教呢樣呢?加燦T在遼寧打工多年,親自見識過薄熙來之霸道及中國之人權,話好了解中國人有錢便想移民之心態,愛國愛黨愛移民,到加拿大法庭唱中國國歌那類華裔加拿大人,各有苦衷嘅。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載