蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月06日
馬上成為壹會員

民企多謝特朗普 - 左丁山

到大業張經營嘅藝術書店參觀,方知藝術天下之大,中國對於藝術書法繪畫珠寶首飾,分工精細,若想成為一門專家,非下數十年工夫不可,若某人話自己是通才,樣樣皆通,就不妨請佢上大業張嘅書店,是但揀一本專書考考佢。當今之世,有人自稱博學,無人膽敢批評,原因為何?因為不少絕學已無人識,ABC話識,其他人點敢反駁?

大業張請左丁山欣賞過顏真卿「祭姪文稿」複製本之後,感慨言之:「此複製品已是四十年前日本根據台北故宮真跡版本原件大小複製,製作一絲不苟,認真,無瑕疵,舉世只有日本人有此耐性及技術,印製得如此精美。」真跡藏在台北,不易示人,通常只會在大節日展出,屬頭號國寶級文物,怎知道蔡英文政府靜雞雞答應借予日本東京國立博物館展出,由2019年1月16日至2月24日,令台灣文化界震驚。一級國寶倘離館後有所損傷,誰人負擔得起責任?有乾隆題字,歷代收藏家印章,真跡如果拍賣,究竟價值多少,唔敢諗,「複製本」亦在市場上不多見。

與大業張拜拜之後,照例在中環周圍行番45分鐘左右當作運動,行到李寶椿大廈之先施,頓生感慨,年青時曾在先施大廈(今南豐大廈)之銀行押匯部學師一個月,學習開L/C、D/A之類(今天已受淘汰),樓下幾層就是先施百貨公司,怎似得現在位於李寶椿大廈地下半邊,走入去睇吓,一啲禦寒背心由2199元減至599元,雖然家中已有羽絨衣物,還是忍不住買咗三件,今年寒流要在聖誕購物旺季過後先至殺到,衣物零售相信非常頭痛。

秤住袋衫在電車路上,畀人拍膊頭,咦,係隱形富翁T,佢在香港老飯店出嚟,咁啱碰到左丁山行過。富翁T話一月一日參加元旦遊行,發覺今年參加人數比較少,擔心明年更難以為繼。左丁山話:「乜你都參加遊行,唔配合富翁身份喎。」富翁T話:「只係略表心意啫,其實我係中途加入,行咗15分鐘就脫隊。」識得富翁T於微時,想當年,佢講過讀中學時係愛國青年,成日戴住毛章讀毛語錄,唱大海航行靠舵手,但後來文革越演越烈,死人無數,佢開始驚,再有長輩勸佢讀吓「明報月刊」如何分析文革,之後就開始疏遠左派,出來社會做事做生意之後,上過大陸無數次,並覺得中共信唔過,而今居然成為暗地裏反共之人。佢有一個觀察:「內地民企富豪要多謝特朗普,北京本已有國進民退,打擊私有經濟之心,點知特朗普搞貿易戰,內地經濟受壓,中央恐怕民企不穩,故此立即轉軚,改為扶持民企咋!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載