蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月07日
馬上成為壹會員

網站眾籌 - 左丁山

特朗普入主白宮後,最著名、廣為人知嘅一項每日必做事情,就係睇電視,而且只係睇霍士電視,朝早睇Fox and Friends當作白宮官員簡報新聞,晚上睇霍士talk show,最鍾意Sean Hannity。霍士電視台係特朗普之傳媒護身符,似足央視為習近平服務,世界上一間電視台與總統關係如此親密,實在罕有,於是美國有人講霍士係State Run TV(官營電視),亦有人惡搞,話美國政府係TV Run State(電視統領政府)。

特朗普罵CNN、紐約時報、華盛頓郵報及其他主流傳媒不遺餘力,有恃無恐,得罪人唔駛本,原因好簡單,有全國收視率最高之收費電視台(Cable TV)撐腰,怕乜同CNN鬥過?日日講大話,都有Hannity同佢護航也。

特區政府會唔會向特朗普學習,故意拉攏一個具影響力嘅傳媒呢?唔敢講,怕且識得學,但唔識得做,香港或者亦冇一個梅鐸咁嘅人物可以幫特區政府講好說話。但好明顯,一啲有心人係知道要搶奪傳媒陣地嘅。印媒方面,全力封殺蘋果,互聯網方面,傾全力發展網媒,希望減輕蘋果動新聞之威力。上一次李嘉誠基金會捐二百萬元畀中大一個兒童診治基金,動新聞嗰段捐款新聞有六七十萬點擊率,加上讀者在社交媒體廣傳,更加不得了,可見動新聞之影響力巨大,惹人妒忌。

不過網站好難經營,一個網站若非幕後老闆有大水喉,有大老闆政治願景,點樣可以聘請700人,淨係記者都過百,規模大過暢銷報紙呀。如果冇大水喉,屬兄弟班形式辦新聞網站,就認真辛苦咯,唯有出到眾籌與捐款呢張牌,希望香港還有有心人,肯支持意見獨立,評論不偏不倚嘅新聞網絡。大記者打電話嚟幾次追左丁山捐錢支持「眾新聞」,佢話:「蘋果加價至十元一份,唔該你繼續訂閱,另外,由楊健興、劉進圖、李月華等資深傳媒人辦嘅眾新聞網站,捱得好辛苦,唔該你捐錢支持,正徵求2000名訂戶,每位每月100元,好多人畀得起啫。」唉,同仁辦報自古不易,今日兄弟班辦新聞網站,同樣辛苦到極,左丁山見過楊健興(Chris Yeung)(前南華早報資深編輯)幾次,以佢咁好英文程度,不如去搵份工好過,駛乜咁辛苦,但Chris等係有抱負有獨立意見嘅資深新聞人,係要為香港新聞界出一分力,係好難得嘅,但面對一個有700名職員嘅網站,點競爭呢,唯有置諸死地而後生,見一步行一步。左丁山為表示敬意,於是寫張支票畀大記者轉交眾新聞。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載