› 選擇地區
三藩市
紐約
洛杉磯
其他美國地區
香港 台灣 北美
 
2019年01月12日

團年開年日子 - 左丁山

元旦過後,有讀者及朋友追問左丁山:「喂……問咗傅會長講團年,開年的日子及豬年運程未呀?要安排時間,訂枱食飯噃。」今年農曆年好快到,二月五日就是年初一,今日確實係差不多要安排團年飯嘞。

前幾年左丁山都有訪問傅會長,然後在本欄發表,但記得去年訪問完畢,傅會長話佢年紀已老,不再製造太歲牌,來年(即今年)亦唔會再講運程一事。所以左丁山一路未有約傅會長做訪問,但見咁多朋友追問,於是上星期再搵傅會長入室弟子問清楚,英文謂之re-confirm,得到嘅答覆係好清楚,傅會長決意歸隱,不談天機,願各人修德積福行善,自能趨吉避凶。

冇法啦,於是在手機問八卦邱有乜好日子,等讀者有得揀。八卦邱授機宜之後,叫左丁山:「再睇埋通勝,係自己簡單寫幾句便是。」高人既然歸隱,也只好如此了。

一月十二日已是農曆十二月初七成日,吉日也,今日團年並無不可。最多人在年三十晚團年,但今年年三十係二月四日,立春偏偏係壬申日破日,冇理由搵破日來團年嘅啫,推前啲,最好係二月一日星期五定日,即安定之日,一家吃晚飯團聚,晚上戌時(七至九點)剛好是晚飯時間,並非凶時,亦適合。二月二日執日,也是吉日,但晚上戌時係凶時,不如早啲開飯,如六點鐘。再提早幾日,就揀一月二十四日星期四成日咯。

二月五日年初一係危日,含危中有機之意,算係吉日,忌行山涉險,二月六日年初二成日,宜開市,啱晒傳統舖頭在年初二開年開業啟市,要注意嘅係早上凶時,開市開舖最好在下午一至三時。二月七日年初三係收日,開舖開工無謂,出行會友皆宜;二月八日年初四星期五,假期完畢,好多人會放埋呢日假,有一個長周末,偏偏這天是開日,大吉日,最宜開市開工、赴任、動土,但朝早返工係凶時,有得揀就在下午一點返工,睇老闆肯唔肯,係老闆話得事嘅又或者係做廠嘅,不妨放足長假,延遲到二月十四日星期四年初十定日先至開工,吉時在未時(一至三點)。

己亥年豬年,在二月四日年三十上午11:16分後開始,之前出生嬰兒,仍算肖狗,之後就係肖豬,豬年犯太歲之生肖係豬(刑太歲),蛇(巳亥相沖,沖太歲),猴(申亥相害,害太歲),呢三個生肖要在豬年行藏小心啲,不過猴(申)人在豬年有四大吉星(天德、福星、八座、玉堂)相扶,可逢凶化吉;豬(亥)人有歲駕、天解兩吉星,相信無大患,蛇(巳)人有驛馬星,主旅遊,多啲出外可免卻本地怨氣!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載