› 選擇地區
三藩市
紐約
洛杉磯
其他美國地區
香港 台灣 北美
 
2019年01月13日

停服阿士匹靈 - 左丁山

當今家長,盛行一句話:「贏在起跑線」,於是兒女讀緊幼稚園,已經要學習普通話、英語之外,還要找幼兒教室學習與英語英文會話、學游泳、學畫畫、學芭蕾舞、學唱歌(最好能加入香港兒童合唱團)、學鋼琴更是必修科,真係個個入水能游、出水能跳,開口能唱、雙手能彈,此外還有不同親子活動,學習焗蛋糕、整餅、法文或西班牙文遊戲等等活動。比起左丁山五歲時一腳牛屎之鄉下仔,依家細路叻上一百倍。

小YY已經後知後覺,帶女參加幼稚園運動會,聽到其他家長講一間兒童畫室好出名,於是散會後就按地址走去為女兒報名,誰知入到門口,就獲派一份單張,話入學要求熱烈,今天報名,大概要一年半後先至可能有學位,小YY以為係香港奇談,連忙短訊通知左丁山。呢啲事情最好問虎媽A嘅啦,佢乜都知,果然虎媽A立即有回覆:「呢間畫室出名好耐,等一兩年先至有位,閒閒地啦,不過我問過一啲畫室學童家長,佢地話教繪畫基本功唔錯,能誘發兒童繪畫興趣,但學生參加國際繪畫比賽,成績好似比較一般!」

香港唔通冇其他畫室學藝咩?立即打電話畀藝術B,叫佢開番間,藝術B話:「我在火炭教成年人,教兒童冇乜興趣,不過如果咁好搵,又不妨諗諗!」

咁講法,藝術B揸住支畫筆,可以一世搵錢,教到80歲都得,藝術家職業壽命,遠遠長過專業會計師、律師、醫生。

虎媽A講完兒童學畫,講吓佢新年去曼谷及華欣,話過得幾愉快,泰國確係旅遊好地方,佢以前少去,以後會去多啲咁講,但遇上一宗小意外,以後要小心注意。虎媽A丈夫到達曼谷在Grand Center Point酒店Check in之後,不知何故,原因不明,丈夫跌落酒店內一個小型水池,膝頭對下裂開一條十字痕,流血不止,酒店護理人搞唔掂,佢緊急向香港求救,小G記得左丁山去過康民醫院驗身,於是教佢哋去康民治理。虎媽A話呢間醫院似四星酒店,服務一流,迅速為丈夫止血,問埋有冇食薄血藥,原本佢每日食阿士匹靈,醫生話:「唔該你打電話返香港問你個醫生,停服阿士匹靈七日得唔得?」香港醫生急覆話可以,虎媽A等先至鬆一口氣,可以如期去華欣,但已得一場虛驚。虎媽A話:「請你哋以後去旅行,問清楚香港醫生及當地醫院電話,食阿士匹靈人士尤其要注意呢樣嘢。」真係從未諗過,日日食緊薄血藥之人要多一重顧慮。由華欣回到曼谷,虎媽A入住Center Point對面間Okura,佢話靚好多,服務好好多喎!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載