蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月09日
馬上成為壹會員

英國人吃鯊魚 - 左丁山

自從國際環保團體發動反魚翅運動之後,影響深遠,單係講香港,好多中產及富有階級年輕人,尤其係自英美加回流嘅留學生,都話唔食魚翅,反對父母食魚翅,風氣所及(其實係環保團體大力推動),不少酒店集團中餐廳再無魚翅菜式,本港魚翅銷量日跌。一個經營魚翅海味嘅商人,有豐富國際經驗,曾經想組織業界,集資進行廣告及公關活動,對抗環保團體嘅一面倒宣傳,但後來發現,呢個行頭嘅老細及從業員,大多數係紅褲子出身,甚少留學經歷,對國際反魚翅運動認識不多,而且不少人有各家自掃門前雪嘅思維,於是籌款不成,反「反魚翅運動」之議亦無疾而終。幾年後左丁山碰到呢位先生,佢話:「依家夠煩啦,生意少咗咁多,三代老店大概唔可以有第四代傳承咯,我地呢行人應付國際環保團體,就好似清兵打八國聯軍,揸住大刀長矛弓箭對抗長槍大炮,當然輸梗。」

呢位仁兄之憤憤不平,係因為佢覺得國際環保團體刻意抹黑華人食翅,指食翅係導致鯊魚滅種之最大原因,其實捕捉鯊魚有國際規管,聯合國有瀕臨絕種之鯊魚名單,西方漁民係全世界捕殺鯊魚最多嘅,有幾百年歷史,並非單單為了中國人食翅而殺鯊,一條鯊魚全身都有經濟價值,魚鰭變魚翅只是其中一項。

西方人吃鯊魚肉,飲鯊魚油之時,還未懂得賣魚翅畀東南亞。仁兄又講,英國人吃Fish & Chips就含有大量鯊魚肉,環保團體人士應該吃過不少,佢地宣揚嘅短紀錄片講漁民捕鯊削鰭,然後將鯊魚丟回海上,簡直違反漁民作業常識,因為成條鯊魚都可以賣錢,為何漁民要丟錢落海?

以上所言,係幾年前左丁山請佢在上海總會吃蟹粉翅之時,聽佢講嘅,之後久未見面。1月31日,BBC新聞網站有一條新聞,指出一項英國University of Exeter研究顯示,英國人吃炸魚有鯊魚肉在內,而且係瀕危鯊魚類。炸魚出售時則標籤為rock eel(岩鰻)、huss(角鯊)或rock salmon(岩鮭),英國人吃了入肚,懵然不知。

左丁山於是將呢段新聞轉發畀上述嗰位仁兄,即C老闆。C老闆回應嘆曰:「我知咗幾十年啦,英國學者,依家先至做研究發現,攞嚟講,西方漁民捉鯊魚,英國人食肉,我地食翅,有乜分別?我地公開吃翅,就畀國際環保組織痛批,英國人食魚肉,詐懵扮儍就冇人理,你話係唔係文化歧視!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載