蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月10日
馬上成為壹會員

買學院做IPO - 左丁山

fb圖片(Westminster Choir College)(互聯網)

中國一間國營公司凱文教育集團,最終股東原來係北京市海淀區,前身經營建築鋼材料,後改名轉營為凱文教育機構,在北京開辦幼稚園、小學,如此公司,無厘頭斥資5600萬美元去收購美國新澤西州一間有名氣,但入不敷支嘅微型音樂專門書院Westminster Choir College,令人不解,凱文又冇公開解釋,唔怪得引起美國人疑慮,恐怕凱文係一隻木馬,乘機滲透美國大學教育界。

立春日碰啱係星期一,有中午飯局,中貿林叫埋師弟投資E上嚟,投資E當年在崇基主修經濟副修音樂,一聽見公子L講2020年會去阿姆斯特丹聽馬勒音樂節,於是話題由馬勒講到聲樂、男高音、嗓音學、音樂廳、聲樂系統,以至HiFi設備、喇叭等等,估唔到賓架P對音樂亦有深入研究,家中藏有好多「膽」,因依家有人在市場搶「膽」,佢收埋收埋一大批,竟然大幅度升值。左丁山話佢係通識之王,除銀行本業外,攝影、電影、開槍(佢係槍會會員),以至HiFi,無一不精,講聖經我地更無人夠佢講。賓架P謙虛咁話:「我唔識嘅,音樂喇叭之學係跟世家公子F學番嚟嘅啫。」F公子祖父是大銀行家,自細精研聲樂,為一個六十年代舊唱盤可以飛去斯德哥爾摩親自檢查。據賓架P引述F公子之言,柏林音樂廳音響最是一流,香港文化中心就不入流,差到極,大會堂叫做幾好,但全港音樂廳最好音響嘅就係沙田大會堂!賓架P話其實中大利黃瑤璧樓之音樂廳雖然細小(容納二百人),音響絕不輸蝕,當年利家慷慨,為音樂廳裝修捐出咗近四千萬元咁講。

冇錢就邊度會有一流設施吖,但投資E等人怕他日西九音樂廳有錢唔識用,變成文化中心翻版,咁就該煨咯。我地普通人聽唔出啫,投資E話曾與師傅級人馬容可度老師去大會堂聽音樂會,容老師聽得出音響有變易,似係換咗地板,後來投資E去查問答案果然係音樂廳換咗幾塊地板。左丁山係門外漢,聽到目瞪口呆,索性同投資E講凱文收購Westminster個案,佢既係私募基金經理,以前做銀行跑大陸,本人又係音樂癡,一聽就明晒,對左丁山講:「師兄,九成係凱文想將呢間美國老牌聲樂學院招牌引入大陸,在大陸開辦音樂學院,掛美國百年老店名牌,學生不愁不來!兩三年後,有幾千以至上萬學生,咪可以搞IPO囉,到時成億億聲美金賺番嚟呀!」一言驚醒夢中人,控制美國一間大學,可以在中國收生幫佢地攞學生簽證入美國……直情係一條大財路,中國學生家長有的是錢嘛,送仔女去到美國,幾多錢都唔計!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載