› 選擇地區
三藩市
紐約
洛杉磯
其他美國地區
香港 台灣 北美
 
2019年02月20日

推前起跑線 - 左丁山

沙田陳太一時之間林鄭月娥上身,問小學二年級生幾個(佢以為)極簡單英文字,點知小二生一面迷茫之色,唔識答,先至知道自己訪問帶有階級性。美國有自由派學者反對大學收生睇重SAT分數,就係因為SAT有考英文部份,不少中下層學生對英文生字嘅認識少於富裕階層學生,譬如窮學生自出世至17歲考SAT,如問caviar呢個字,都唔知係乜,而來自私立名校嘅學生可能自小食到大,當然手到拿來。今時今日,香港中產以上家庭,二歲以上幼童相信都識唱嗰首席捲全球,YouTube瘋傳嘅Baby Shark, doo doo doo doo,但家中不識英文嘅家長,無菲傭湊住嘅七歲孩子,又未必認識呢首西方兒歌噃。

林鄭特首之問三歲小孩暴龍英文係乜?畀不少人取笑佢堅離地,但左丁山相信,林鄭之所以咁問,別無他意,而係階級意識條件反射,在林鄭嘅階層,有邊個兒童唔係出世不久就學唱英文歌,London Bridge、Twinkle Twinkle呢類歌呀,未夠三歲就識得Monster、Peppa Pig啦!見到孩子手持卡通暴龍,於是衝口而出:「暴龍英文係乜呀?」其實問得十分自然,佢只係忘記咗小孩未必係讀緊國際幼稚園(英語、普通話教學),而或者係讀緊學券幼稚園(本地非牟利中文幼稚園)嘅呢。

講到暴龍,有報紙體育版譯Toronto Raptors為多倫多暴龍,不知有何根據,陸谷孫英漢大詞典指Raptor係肉食鳥、猛禽,與暴龍扯不上邊。問小丫丫個女,佢唔識噃,問肥仔K太太(英文老師),佢話暴龍應該係Tyrannosaurus,有四個音。三歲小孩未必能夠掌握讀音,一般簡單寫法,教細路讀T.Rex。小丫丫聽到,即刻話「咪係囉,睇侏羅紀公園係有T.Rex㗎!」原來如此。

相信林鄭問問題之時,就以為小孩子識答「T.Rex」。肥仔K話經此一問,今年去名校叩門要準備仔女識答暴龍英文係乜,答T.Rex得5分,答Tyrannosaurus得10分!肥仔K話有名氣幼兒園入學申請者極眾,仔女一出世就要報名,等到一歲已經太遲,佢一位中學同學踏入2019年有添丁之喜,過年前還未滿月,同學已經去沙田禾輋救世軍幼稚園報名,排到第三十幾名。肥仔K好奇之下,查詢究竟,得到以下答案。2021年N班:34人;2020年K1:收50人,排到4百幾,2021年K1:收50人,排到3百幾。肥仔K嚇了一跳,笑言:「老婆一大肚就去報名?」香港人興講贏在起跑線,給林鄭特首講一句「暴龍」,條起跑線又要推前幾丈!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載