› 選擇地區
三藩市
紐約
洛杉磯
其他美國地區
香港 台灣 北美
 
2019年05月12日

將軍逃犯 - 左丁山

互聯網

日前陶傑講逃犯條例之修訂,引張發奎將軍為例,勾起左丁山若干回憶。

修訂逃犯條例,目前已進入夾硬嚟階段,林鄭李家超猛話心急,都唔知急在那裏。疑犯香港人在台灣謀殺女朋友(香港人),基本上台灣並無強烈關注性,又唔係香港人在台灣謀殺台灣人吖嘛,睇真啲,台灣當局對此案毫無逼切破案之心,知道嫌疑犯潛逃返回香港,於是由非官方機構向香港間接交涉,得唔到回覆,也不緊張跟進,只係發出全球通緝令(長達37年),等逃犯無處容身,只能蝸居在港,咁就算係了事。呢位逃犯以後在香港會搵唔到工,冇朋友,連親戚都疏遠之,成為寡人一個,無依無靠,甚至有人知道佢姓名之後,冇法子搵到地方住,被社會徹底孤立。香港豈是呢位逃犯嘅天堂,直情係人間地獄也。林鄭李家超有乜好心急?不如急市民真正所急,解決醫委會保護主義啦。

1949以後,香港確是大陸不少難民之避秦天堂,不少係敗軍之將,國民黨軍官,在中共官方文件係通緝犯,人民敵人!好彩及早走咗嚟香港,而港英政府唔修訂甚麼條例,將佢地「送中」。呢班人後來由鑽石山,調景調,石硤尾,元朗走出嚟,培育下一代成材,貢獻香港甚多。范徐麗泰父親都係咁樣情況嘅啫,以此觀之,香港從來都係赤色中國之逃犯天堂,逃犯後人促進咗香港之社會及經濟成長。

上星期有建制派人士搞「快閃唱國歌」,搵埋年近七十歲嘅成龍,譚詠麟參加,都唔知對年輕人有甚麼吸引力,起碼都搵個中年古天樂吖!現時每日主要電視新聞播放之前,就會播出國歌,開其端者就係回歸後嘅公民教育委員會主席香灼璣,即曾蔭權之表哥。香灼璣父親係邊一位呢,就是香翰屏將軍,戰時與余漢謀將軍齊名(余叔韶先生之大作「與法有緣」有提過香翰屏將軍名字。)香翰屏係東莞名將之一,東莞橫瀝村頭村姓香,幾十年前有間新式小學,學生可受訓成為銀樂隊成員,創廣東先河。據先父講,間學校就係香翰屏捐贈興建嘅,鄉人十分感恩。1949年國軍敗走,張發奎香翰屏等逃亡到港,家產盡失,香翰屏在元朗屏山,因子女眾多,養家艱難,曾在石硤尾街頭擺賣書法,左丁山阿哥就買過一幅,可惜阿哥過身後,幅字不知去向。香將軍當然不容於共產黨,好彩港英政府冇將佢送中。至於兒子香灼璣日後愛黨愛國,不跟父親唱「三民主義,吾黨所宗」,改而發起電視台報告新聞前播義勇軍進行曲,則是另一回事了。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載