› 選擇地區
三藩市
紐約
洛杉磯
其他美國地區
香港 台灣 北美
 
2019年05月21日

稀土作武器 - 左丁山

互聯網(互聯網)

見到博士Y,聽佢講及中國留美科學家之進退兩難,於是同佢講:「咁啦,你不如同你的世姪世姪女學生嘅家長講,只有兩條路走……一就是申請入美籍,宣誓效忠美利堅合眾國,不再回頭,忠心做美國人,留美不返;二就是下定決心做愛中國人士,即是放棄自由的精神、獨立的思想,聽黨話、跟黨走,回到中國大陸工作。如果人在美國,心懷中國,捨不得美式生活卻又忘不了要為振興中華服務,人生會好痛苦,一下子處理不善,被視為共諜,咁就一生盡毀!」博士Y話:「你講就易啫,大把中國人到美加唱完美加國歌,都繼續歡呼中國崛起,高唱中國厲害了!」

呢啲矛盾,無謂再講,既是理科博士,應識稀土,便向佢請教稀土是否中國打美國貿易戰嘅一張王牌。博士Y話:「幾難講,中國現在擁有全世界稀土儲藏量之23%,係內地網媒講嘅,但世界市場佔有額係95%,咁係乜嘢意思?即是其他有稀土資源嘅國家,一於唔開採,只向中國買,於是中國開採稀土最多,儲藏量跟住下跌。外國點解鍾意買中國稀土?一來開採技術複雜,係中國領先好多,二來開採稀土會造成高度環境污染,兩三年前馬來西亞稀土礦場就因為環保團體激烈抗議而停擺。哦,中國唔怕污染呀,啱晒,幫中國買咪得囉,既可維護本國環境,又可以等到中國愈嚟愈少稀土存量之後,本國先至開採。日本幾年前在東京以東1800公里之南島發現暗藏巨量稀土,可用780年,但一路唔講,到2018年先至宣佈,目前仍然繼續向中國買,你話中國獨佔市場夠精吖,還是日本之類只買不採先至夠精呢?」有咁嘅事,左丁山唔識答。假使中國禁運稀土,打擊美國高科技企業,美國會點樣應付?短期內梗係有啲蝕底,但咁樣一定會刺激日本美國聯手開發稀土儲藏,幾年後取代中國成為最大出產國,抵銷中國禁運。稀土即是稀有金屬,為今天高科技產品原材料不可或缺的,中國一旦禁運,短期可勝利,長遠就無乜得益,道理與OPEC將油價逼上,去到每桶150美元之後,美國就大量生產頁岩油嘅道理相同。如無中國稀土供應,美國必定加快與日本合作開採,提煉稀土嘅啫。內地一啲學者一講到對外角力,往往民族主義上腦,或是因為要跟黨走,故意埋沒獨立的思想,發表些啱領導人聽嘅說話。如此言論,講出來反被美國人所笑,例如Black Rock就公開表示中國唔敢大規模沽售美債,中國人民銀行敢唔敢做吓嘢,以證明Black Rock嘅估算錯誤呢?

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載