› 選擇地區
三藩市
紐約
洛杉磯
其他美國地區
香港 台灣 北美
 
2019年05月25日

讀名校又如何 - 左丁山

互聯網

自從爆出一位內地通緝犯(已離開中國)斥資650萬美元,搵方法送咗女兒入史丹福大學嘅新聞傳出之後,史丹福大學畢業生身價大增,有一位青年才俊自小移民加拿大,讀UBC,之後到史丹福讀完碩士,現於科技公司工作,對容海恩係佢UBC校友之說,感到好慚愧,有人話畀佢聽,容海恩係史丹福校友葉劉淑儀徒弟呀,佢更加掩住塊面:「佢兩位在UBC、史丹福讀過乜嘢?」

哦!難以深究了,正是人之不同,各如其面焉,又話一樣米養百樣人,同一間大學讀書啫,你估大家有同一個理念咩?況且即使大家有相同老師,讀同樣課程,畢業出到社會,有人想快快趣平步青雲,於是識時務者為俊傑,盡快依靠權勢人物,搵食啫。

左丁山對另一位史丹福校友講:「原來入史丹福要650萬美元,你間科技公司有三位校友,加埋你,四個650萬美元,即係2600萬美元,唔講得笑,去搵創投基金攞投資,如公司估值時不妨打埋呢條數入去!」校友話:「撞你個鬼,我入史丹福讀碩士,只是網上報名申請,憑GRE成績及大學GPA入咗去嘅,駛乜搵中間人磅水?」

講笑啫,左丁山起碼有三個世姪女入咗史丹福讀學士學位,全部係靠考SAT及中學成績申請成功嘅,佢哋嘅父親係高級打工仔,一定攞唔出650萬美元嚟送女兒入學,呢啲事情係由美國荷里活明星/權貴搞出嚟,中國大款發達時磅慣錢畀書記省長廳長,好懂得有錢駛得鬼推磨嘅道理,送子女入名牌大學比荷里活明星更豪、更大手筆!

到美國留學,所為何事,學科技?攞個學位返中國大陸炫耀,還是想留美打工不返?或是學懂竅門,就回國下海若干年,跟住創業挑戰馬雲、馬化騰?香港與內地人近年聽過、見過、讀過中國科技進步、挑戰美國科技霸權嘅新聞,大量寫手不停在微信微博誇讚中國科技如何厲害,想與名校海歸派有料到有關。左丁山對科技發展唔敢話有大認識,上星期華為聲稱沒有美國晶片,華為照樣可以運作如常,但FT及CNBC就報導沒有美國晶片,華為形同半癱瘓,究竟邊樣真?且看後事如何發展,但是美國三藩市市議會為咗市民私隱與人權,投票禁止警方用「臉譜識辨」科技來監控犯罪分子,就足以發人深思,點解中國不停歡呼臉譜識辨技術,在張學友演唱會找出逃犯,而三藩市竟然禁止使用?點解Google、Amazon僱員反對為五角大廈研究AI作軍事用途?華為研究人員夠唔夠膽講呢啲說話?相信中國留學生到柏克萊、史丹福係唔敢學習獨立思想,自由精神的。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載