› 選擇地區
三藩市
紐約
洛杉磯
其他美國地區
香港 台灣 北美
 
2019年06月01日

恒生大學榮譽院士 - 左丁山

(左起)冼為堅博士、梁高美懿女士、鄭海泉博士、趙應春先生,香港恒生大學圖片

在Rosewood吃午飯,本來要擒擒青鬆人,因為下午恒生大學舉行榮譽院士頒授典禮,而四位榮譽院士皆是多年老友,非要捧場不可也。但地產F一早講明食靚嘢,慢慢嘆,早有預備,帶來一款新型B&O藍牙擴音機,開iPhone,懷舊金曲源源不絕,透過音色極佳嘅B&O,傳來繞樑三日之蔡琴鄧麗君歌聲,加上窗外露台細雨濛濛,維多利亞海景水天一色,如此環境,怎可狼吞虎嚥,咬兩啖香口煎魚頭就同大家拜拜?地產F話,大家到了這個年紀,應事事輕鬆,忘卻小事煩擾,注重能享受則享受,方可賺取年齡也(即超越香港男人平均年齡81歲)。

但如果慢慢嘆,驚趕唔切喎,地產F夠晒大方:「我叫司機車你,包你唔遲到。」真係為之多謝又多謝,於是等到食埋甜品,由司機車回屋企換上一套西裝,再到中文大學坐校巴去恒生大學,時間綽綽有餘㖭。

校巴上有中大副校長霍泰輝教授,新亞院長黃乃正教授、公關處長張宏艷、校友事務處長鄭健文、拓展處處長周瑤慧等人,再順路經過威爾斯親王醫院接埋沈祖堯教授,直奔離開醫院不遠嘅恒生大學。

是日得到榮譽院士學位嘅名人全部對恒生大學之開拓與建設有功有勞,即是鄭海泉,梁高美懿,冼為堅與趙應春四位,誰曰不宜!鄭與梁高係前恒生銀行總裁,由恒生商學書院至恒生管理學院、恒生大學,貢獻遠大,冼先生係前恒生銀行董事,支持恒管不遺餘力,趙應春係傳媒老大哥,近年幫助恒大新聞系爭取業界認同及社會地位,恒生大學頒授榮譽院士予四位,左丁山與四位均相交相識數十年,與鄭海泉在旺角街頭認識,其後成為新亞經濟系校友,至今認識五十一年,與梁高美懿一齊做銀行trainee,三十年前轉入新聞界,就與大哥級人馬趙應春相交,冼先生則是自己還是見習生時候嘅銀行客戶,能與佢地長期交往,實在感恩。

頒授典禮由現任恒生銀行行政總裁、恒大校董會主席鄭慧敏及校務委員會主席鄭慕智主持,儀式過後,大家齊去接待廳影相,情況非常熱鬧,恒大教職員中有不少係中大舊人,副校長方梓勳教授就係新亞英文系師兄,左丁山對方師兄講:「幾年未來過恒大又多咗咁多建築物!」方教授話:「要多謝校董會大力支持,有願景有動力,恒大進步得快,係好得到社會人士支持嘅!」正是得道者多助,恒生大學拓建迅速,校園嘅設備齊全,加上教授陣容老中青三結合(不少係中大過檔之名教授)朝氣蓬勃,唔怪得轉型不久,就可以正名為恒生大學了!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載