› 選擇地區
三藩市
紐約
洛杉磯
其他美國地區
香港 台灣 北美
 
2019年06月12日

局長講笑話 - 左丁山

6月9日遊行之前,端午節凌晨,有兇徒在灣仔警察總部外向警察衝鋒車投擲汽油彈,跟住跑馬地警署又發生同樣事件,實不知有何居心,於是建制派乘機大做文章,在網上發佈6月9日遊行會演變成「兇襲騷亂」,警告市民不要參加遊行。另一邊廂,則有人懷疑是某方別有陰謀,意圖製造恐懼,賊喊捉賊,欲嚇走善良市民參加遊行。

今時今日,陰謀論充斥,譬如林鄭月娥強行心急推動修訂逃犯條例,飽受傳媒抨擊,馬雲旗下的南華早報評論文章不止一次質疑修訂條例何太急,如6月7日有整版文章Does fugitive bill spell game over for Lam ?內文對林鄭甚不客氣,指她可能是用「心」行事,不經「頭腦」,類似盲動。一位朋友看後,來短訊詢問:「馬雲是不是CY的老友?」鬼知道咩,南華早報對「逃犯條例」不予好評,可能係因為一張英文報紙,讀者以外國商人、本地洋人為主,點都唔好意思寫文章好似大公文匯咁款呀嗎?況且南早仍未完全掃走晒外國人記者編輯,而呢班人會在FCC出入,點會毫無新聞工作者之專業水平吖。

做保安局局長就唔使有專業水準,罵即管罵,好官我自為之,吹吹呼?譬如面不紅,講中國司法獨立排名世界前列,而唔講習主席曾在二月發文聲言,中國決不能走西方司法獨立路子!林鄭特首,鄭司長,李局長,梁愛詩,譚惠珠等要講中國司法制度,永遠不敢提及法庭有黨委(政法委)書記呢回事,黨委管邊瓣?政治囉,法院政治由黨委書記話事,人所共知,黨委先至係法庭第一把手,法庭有乜可能司法獨立,公平公正?習主席還是小習之時,人大委員長彭真已經問過:「黨大還是法大?」卒之還是黨大,此乃中國司法制度特色也。建制派中人唔敢講,就唔講啦,做乜瞪大眼扮無知講大話啫。

李局長還有名言:相信中國傳媒有專業精神,中國也有新聞發佈會!呢句話一定把呂秉權、胡力漢等中國新聞專家嚇死,中共最叻就係控制傳媒記者,傳媒一定要聽黨話,跟黨走,不能有自由的精神,獨立的思想,否則就會輕則被踢走,重則處以「經濟犯罪」罪名;如此情況下,中國記者為咗求生存,還可能有甚麼專業精神?人民日報會係要紐約時報咩?香港高官為咗份高薪,搵食啫,唔敢表達心跡都算啦,公開講一啲完全與事實不符嘅嘢,點對得住耶穌會教育!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載