› 選擇地區
三藩市
紐約
洛杉磯
其他美國地區
香港 台灣 北美
 
2019年06月13日

「大灣駒」撼「美麗傳承」 - 左丁山

好多老友平時學似李國章教授,唔睇文匯、大公兩份愛國報紙,其實到上海總會吃午飯,呢兩份報紙擺在接待櫃枱任攞唔嬲(但目測知道,冇乜人要),吃飯時拎份無妨。6月7日蘋果日報頭版之法律界人士黑衣遊行圖片,極有震撼性,應永留香港法學史,作為一張重要歷史圖片,左丁山望之再三,深受感動,全港法律界元老精英及下一代近三千人,齊齊上街進行反「逃犯條例」遊行,所為何事?林鄭月娥見之難道還是冷笑一聲,視昔日同窗(本港法學精英多是港大校友)如無物?人讀港大,佢讀港大,唔通係佢最叻最醒(或者葉劉淑儀師姐都冇佢咁醒)?又或者,佢可以倚賴精英湯家驊作扶手棍,與及U-Turn(南華早報標題)陳弘毅之言?陳弘毅當然又係醒目仔女,看風駛隽快速無倫,王志民一叫歸邊,呢位大教授(基本法委員會委員)如南早所講,來一個醜樣轉軚,唔記得自己提出過「港人港審」了,以後港大法律學院學生上佢堂,唔知駛唔駛問吓:「陳教授,你今日教嘅嘢,明天會唔會U-Turn㗎?」

文匯報在6月7日頭版標題:「法律團體紛挺修例,專業理性護國保港」,提及約二十個法律團體到政府總部請願,支持修訂逃犯條例,呢班係乜嘢人呢,有陳曼琪、黃英豪、陳曉峰、黃國恩、丁煌、鄺家賢等,唔知大家識唔識?呢個陣容與參加遊行反對修訂條例嘅大律師陣容比較──如李柱銘、張健利、梁家傑、何沛謙、駱應淦、余若薇、吳靄儀、徐嘉慎等人,論在法律界身份地位及權威性,就似係沙田跑馬,搵隻「大灣駒」與「美麗傳承」一齊跑一千六百米。邊一方係「大灣駒」,邊一方係「美麗傳承」,讀者可以自己評估。

不過咁,朝上有人好做官,各自請願,領導人就可以選擇性聽取某方面意見;唔鍾意聽到嘅團體,可以拒諸門外。最近有Yahoo網上民意調查、中大民意調查,總之有民意調查就係發現到反對修訂逃犯條例嘅意見佔多數,林鄭特首可以選擇唔聽!明報委託中文大學傳播與民意調查中心做嘅調查,發現年齡60歲以上,教育程度中三以下,家庭月入低於15,000元,即是二低(教育,收入)一高(年齡)嘅市民比較支持修例,林鄭睇到呢啲數字,大概要放低身段,唔當自己係港大精英。最多反對修例嘅係二高一少(收入最高,教育程度最高,年紀25至39歲)人士,呢班人係香港之未來,群起反對政府呀!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載