› 選擇地區
三藩市
紐約
洛杉磯
其他美國地區
香港 台灣 北美
 
2019年06月17日

中央的負累 - 左丁山

資料圖片

一位馬主在星期三晚對左丁山講:「馬會真係叻,一年之前制訂今季賽馬時間表,好似預知未來,六月九日星期日唔跑馬,改在六月八日星期六跑,六月十二日夜馬,又識得在沙田舉行,唔係如常在跑馬地,唔通馬會編排賽事嘅人士,有天眼通、水晶球或者係術數高手?」邊有咁巴閉呀,可能係純粹夠運啫,馬會係本地以至亞洲最大慈善機構,正是一向做得好事多,故此好人有好報,每每能夠逢凶化吉,假如6月12日夜馬係在快活谷舉行,一定會取消咗!當晚中環至灣仔交通大亂,警察忙於集中人手對付示威者,甚至忙於打人,邊度仲可以分神去快活谷馬場維持指揮交通及人流吖。

馬會力場威力,近兩年來發揮得淋漓盡致,次次天文台發出黃雨或雷暴警告,一到馬兒開跑,警告一定失靈,唔知天文台有冇科學解釋呢?

有馬跑就有群眾,此乃香港特色,大把叻人雲集喺馬場。碰到一位與港英官員(當然現在已經退晒休)有來往嘅馬迷傾反送中條例,呢位仁兄P啱啱最近同前退休高官食過飯,佢話前高官見到小妹林鄭依家咁一意孤行,強力橫蠻推動修訂逃犯條例,十分震驚。仁兄P引述前高官講:「我地商討遣返嫌疑罪犯返大陸時,小妹都只係高級政務官,幾時輪到佢講嘢,當年我地同北京傾過不同方案,又檢討過內地司法制度,最後覺得都係唔掂,故意留白,故意將件事不了了之。點知現在小妹話我地唔識堵塞漏洞係鴕鳥,有冇搞錯呀?」有人認叻認好打得就真係弊嘅,現在林鄭自己認修訂逃犯條例係佢自己主意,並非北京吩咐,中國駐英大使劉曉明接受BBC訪問,就指「事實上,中央從未指示香港修例,此次修例是香港政府自己發起的,起因是一件發生在台灣的兇殺案。」劉大使也提及堵塞漏洞之說。大家清楚啦,一位自認好打得嘅精英以為台灣殺人案係天賜良機,畀佢一個機會大顯身手,既可(一)送疑犯到台灣;(二)堵塞港英以至到梁振英都唔識做嘅漏洞;(三)為中央開始在港捉第二位肖建華而唔需要偷偷摸摸咁動用強力部門。聽起嚟好掂,中央自然不會反對。誰知政務官不是政客,不懂得政治及市民心理恐懼,林鄭一腳踩入黃蜂窩,死晒火,反為累親中央要死頂,叫中聯辦喝住人大政協歸邊!依家林鄭已為中央添煩添亂,萬一特朗普唔生性,在G20會議見習近平問起呢,can China and Hong Kong work it out?你估習主席會高興咩,唔怪得南早話佢就快game over咯。(按:交稿之時,林鄭已暫緩修例。)

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載