› 選擇地區
三藩市
紐約
洛杉磯
其他美國地區
香港 台灣 北美
 
2019年06月21日

潛在威脅 - 左丁山

老友M嘅一位朋友在上海做生意定居,星期一返嚟香港見吓親友,發覺香港報紙長篇大論講二百萬人上街,為之大驚,話人在上海,對此事(送中條例)一概不知,完全矇查查。朋友M慨嘆,內地封鎖消息之嚴密程度,令人嘆為觀止,於是諗到:「上海咁樣有乜資格同香港爭做金融中心?」左丁山答:「當香港變成上海之後,上海一定贏香港!」如何將香港變成上海?說難不難,只要林鄭或下任特首夠膽,得中央全力支持,一聲令下,全面禁止Google、fb、 WhatsApp、YouTube等社交媒體出現,只准香港人用微博、微信、百度嘅話,同時限制CNN、BBC、紐時、華郵、FT等外國媒體自由採訪嘅話,香港就同上海冇大分別啦。當然還要冚咗蘋果日報!

問題係中央敢唔敢如此,要做實做得出,問題係帶來甚麼中央不願付出的代價。將香港變成上海般封閉,對中國有甚麼好處?好處全部係政治性,共產黨可以將香港搓圓㩒扁,一如上海,再冇「外國勢力」搞搞震,再冇人反乜反物,中央可以耳根清淨。代價呢?歐美不再給予香港特別優惠,美國視香港為中國一部份,不再給予獨立關稅區地位,目前1300幾個外國公司辦事處紛紛撤離(多數去星加坡)……咁搞法,香港經濟增長就不知從何而來,沒有了金融與貿易的自由度,香港地產苦了跌到老母都唔認得,香港要靠中央救濟,殺死一隻會生金蛋的鵝,由內地富翁來港大力托市,在世界舞台中國領導人還有甚麼面子?計過度過,習近平一代中國領導人,如果有歷史眼光的話,理應明白香港之世界戰略作用,效法毛澤東周恩來,視香港為南風窗,除咗國防外交嚴控,就留下一個老年紫沙茶壺算了。最現實嚟計,香港人最緊要搵食,對內地政治愈來愈冷感,現時三十歲以下年輕人(未來香港主力人口)根本對大陸冇興趣,只有小器到極、自卑到極嘅人先至會驚怕香港人真係要搞獨立,中南海內唔通人才短缺,咁都睇唔到?

朋友M話:「最怕中共認為管14億人管到服服貼貼,全部聽黨話跟黨走,何物香港得七百幾十萬人夠膽咁多聲氣,妄議中央,係要壓制,將香港變成上海咁管,派人做特首辦黨委書記,行政會議書記!」左丁山話理性分析應該不會,朋友M話,共產黨會日日同你講理性分析吖,總之香港唔聽話,做老母嘅就要用藤條打仔!然後佢再傳一位內地徐焰少將的2018年講話,指香港人很壞,比台灣還要壞,都幾嚇人,呢位徐少將未必有影響力,但內地一些軍人對世界認識比較少。諗落又有啲潛在威脅,點好呢?朋友M話:「我已經將一半銀行存款設咗為美元存款。」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載