› 選擇地區
三藩市
紐約
洛杉磯
其他美國地區
香港 台灣 北美
 
2019年07月07日

明撐實反 - 左丁山

新加坡樓價連跌兩季之後,最近反彈,勢頭來得急速,竟然彈升至五年新高。原因任你講,但當地金融地產界人士話香港送中條例對新加坡大有幫助,香港人資金,尤其是大陸富豪資金一旦大量流入新加坡,唔係人咁品。好彩香港人動起來,令好心急嘅林鄭成為跛腳鴨,再冇本錢走快兩步,逼住將送中條例送入雪房,於是本地中產又有信心入市,會德豐嘅將軍澳新樓盤首先得益。

今後股市走勢如何?有評論員指李柱銘是絆腳石,阻住股市升,其言論非常高深。李柱銘識唔識評論股票呀?佢最近有唱衰股票咩?簡直莫名其妙。講到尾原來係執忠心耿耿嘅葉劉淑儀口水尾,話李柱銘曾經在立法會贊成修訂逃犯條例。吳靄儀及李柱銘已見過記者駁斥葉劉斷章取義,邀請葉劉公開辯論,葉劉至今冇回應,當聽唔到,但建制派乘機將葉劉言論廣傳,無乜分析能力嘅藍絲就信以為真。今天事實證明,送中條例不得人心,刺激富豪走資,送中條例叫停後,股市即在六月十日開始持續上升,說明上述評論員不知所云。假如林鄭仍然企硬要通過條例,或者出爾反爾,等示威寂靜之後,再在立法會提出議案,到時股市一定變蛋散,葉劉之流才是股市頭上一座大山呀。

有人問及,既然富豪大商家個個開口撐修例,何解背後攞錢去新加坡(據私人銀行家對外電透露)?此則與中國DNA有關,中國人從來富不與官爭,唔似得美國佬商家公開與總統抬槓,故此政府一問,王志民一訓話,如田北俊所言,快趣靠晒邊,凡公開談話,一定表忠。但如《明報》高志堅所寫,佢係財經版主管,與商界領袖人物接觸不少,知道幾乎冇一位商界領袖級人物支持修例,個個都係「明撐暗反」,故此林鄭愈強硬,佢哋愈快走資,甚至乎出到撻訂一招,搞出INED(獨立非執董)要求召開緊急董事會,投票撻訂嘅一幕,創香港上市公司先河。凡做過INED嘅人士都知道幾時輪到自己有實力要求召開緊急董事會呀?大股東主席唔講,邊個會出聲?呢位INED並非等閒人物,而是八面玲瓏,聰明絕頂,經驗豐富無比嘅石禮謙議員,佢在立法會自稱無能,唔做法案委員會主席,已是一絕,繼而要求公司撻訂更是妙計。凡真正支持送中條例嘅商家,相信都係已故劉迺強口中嘅小商人,大商家邊會咁笨!可憐不少小商家還是甘心做藍絲帶,而又知道自己唔會得到金銀銅勳章。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載