› 選擇地區
三藩市
紐約
洛杉磯
其他美國地區
香港 台灣 北美
 
2019年07月19日

民不畏死 - 左丁山

浴血新城市廣場之晚上,左丁山有家人請吃生日晚飯,於是2018/19馬季最後一場之後,移師會所凱旋廳。肥仔K中咗四重彩,好不高興,但成晚一路吃,一路睇住手機,留意遊行情況,另有家人參加沙田遊行之後趕到,佢地話:「幾peaceful喇,源禾路衝突,只是小事,我在現場見唔到有激烈打鬥。」食飯到後來,知道警察攻入新城市廣場,大家知道大件事,因我地對沙田新城市廣場極熟悉,知道一旦群眾冇法子搭東鐵離開,會變成困獸鬥,浴血事件隨時上演。

其他後來事件不再講了。返到屋企後,生日嘅家人來短訊:「令我想起《齊瓦哥醫生》場景,即是係有一幕,達官貴人於宮庭內有盛大宴會,載歌載舞之際,外面街頭已有革命分子與軍警大打出手,埋下沙皇皇朝敗亡之伏筆。」左丁山記得舊電影《夏灣拿》亦有一幕,1958年夏灣拿上流社會,外交官與古巴政府高官有豪門夜宴之時,卡斯特羅已兵臨城下。當晚我地在凱旋廳吃晚飯,雖然遠遠比不上甚麼夜宴,但有藝術家氣質之家人有感而發,亦令左丁山為之一驚。目前香港社會極度分裂,本來已有不少社會民生問題要正視解決,例如土地不足、樓價高企、醫療人手短缺等等,係一個聲稱有為嘅政府應視之為最緊急,最優先嘅本土大事,點知每年考第一嘅特首好心急推動凍結幾十年都無所謂之《逃犯條例》修訂,製造一個爛攤子,禍及全港。

政府當權建制派至今仲係心胸閉塞,似乎盲咗對眼,一味口中唸唸有辭:「黑手策動年輕人,外國勢力干預,美國間諜指揮,暴徒打手收錢行事。」呢套八股,除咗惹人討厭,侮辱智慧之外,還有何對策呀?成班行會「精英」只得一個老太太葉劉喋喋不休?任志剛只曉痛陳暴力亂港?政府之管治精英在主要關頭,原來還是被特首一人指揮嘅傀儡,言之痛心。在聽話政治體制下,就會出現如此荒誕鏡頭,林鄭一味倚賴警方鎮壓,一定將香港推向危險邊緣!年輕人以行動表明:「民不畏死,奈何以死懼之?」收錢打仗嘅僱傭兵會面對更強大兵力之時,便知難而退,棄械做逃兵。只有受思想理想推動之青年至會拚死無大害,係要同你死過。呢個道理十分顯淺,林鄭主修社會社工,如不明白此點,實在有辱港大師門。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載