› 選擇地區
三藩市
紐約
洛杉磯
其他美國地區
香港 台灣 北美
 
2019年07月22日

𡃁仔世界 - 左丁山

7月17日書展開幕,上午11時15分就有唐端正教授等人主講「新亞與香港」,本想第一時間去霸頭位,點知早上就被提醒:「今日12時正有午飯聚會」,哎,唔去得會展㖭,本欲推卻午飯,直奔會展,但再次被人提醒:「上次你已經唔記得另有約會,臨時推咗,先至改期到今日,你點好意思再推?」又係噃,在中環點可以咁冇誠意,偏偏時間撞到正,唯有忍痛割愛,唔去書展。7月8日星期一晚,在家為咗電腦打印機暫時失靈,搞到一肚火,急call肥仔K幫手修理,整番好晒之後,老婆叫埋枱食飯,點知電話響起,一位新亞校友打嚟:「喂,你係唔係塞車呀?我在沙田馬會等咗你近一個鐘頭。」一聽幾乎呆咗,唔記得咗同校友L晚飯之約㖭!急忙唔理老婆面色一變,就衝出門口去馬會。

人老咗就開始冇乜記性,雖然將約會記錄在手機,如果唔翻查都係冇用,一如許冠文以前講畀左丁山聽:「出門口唔記得戴錶,急忙返去戴番,一戴就睇到左手手腕已有一隻錶!」月前在皇朝會咖啡室食晚飯,見一個男人望過嚟幾眼,跟住又走過嚟「散步」幾秒,左丁山不以為意,後來該男士返埋座位坐低後,老婆踢左丁山一腳:「嗰位先生似唔似許冠文。」急忙抬頭望多幾眼,又幾似噃,不過唔敢肯定,於是走出去問經理:「許冠文先生今晚有冇嚟?」經理話:「有呀,坐緊嗰邊。」於是撲過去相認,許冠文話:「我都懷疑係你㗎嘞,不過行埋你枱邊,你全無反應,我以為認錯人,唔敢叫你!」大家年紀差不多,已到了「左右手都戴錶階段」,甚為可笑,故此越發覺得,這個世界未來是年輕人的,我地最多在後面畀吓意見,講吓過往經驗,但千祈唔好阻住地球轉,或曰:「班𡃁仔不知天高地厚,會搞死香港。」鬼知咩,二十年後,最多去到2046,今天嘅行會成員或司局長到時都可能在天堂打麻將啦,世間事,誰管得!

1949年之時,中國變天,鄧小平45歲,林彪42歲,江澤民23歲,胡錦濤7歲,胡耀邦34歲,呢班人當時幾年輕!林彪20歲參加南昌起義,鄧小平23歲參加共產黨地下工作,江澤民讀上海交通大學時大搞學生運動,罷課示威,只係20歲出頭,蔣介石41歲就任國民政府主席,毛澤東28歲參加創立中國共產黨,以上各人全部都係「𡃁仔」參軍、參政、參黨,將當年的老人家掃進歷史堆後,後之視今猶今之視昔,我地班1970年代開始在中環打拼之人,到了21世紀都係無謂阻頭阻勢。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載