› 選擇地區
三藩市
紐約
洛杉磯
其他美國地區
香港 台灣 北美
 
2019年07月26日

亂吹雞害建制 - 左丁山

上星期六添馬公園有「守護香港」集會,據香港01網站報導,赴會者有不少係「同鄉會」人士,簡直是十步一會。建制派嘅組織能力係好高嘅,不少人有旅遊車接送,一來一往,甚有秩序。當然亦有不少保守派人士參加,左丁山就有不少老朋友在社交媒體發照片,以示佢哋在添馬公園參加集會。若以年齡估計,各媒體之現場照片,似以中年以上人士為多,與司儀陳百祥、肥媽差不多。上台嘅有兩位老人家,即是譚惠珠與梁愛詩,啱晒TVB觀眾口味,因為TVB觀眾大多數係四十歲以上也。

如此陣容,對年輕人當然毫無吸引力,一位朋友係廣東地區政協,聽到吹雞聲,當然要去添馬公園亮相,佢又想做吓聲勢,叫人事部拉公司職員跟佢一齊去,點知十居其八都話星期六下午放假,約咗人,又有人話怕熱怕曬怕落雨,總之冇人願意跟佢去,最後人事部經理及幾位經理級人馬識做人,唔想老闆冇面,一齊跟老闆去,當然個個都係年近五十啦。

又收到投資基金E嘅短訊:「昨天與科技公司年輕老闆會面,佢話6.9、6.12兩日,公司有成8成技術員工請假,6月份公司登報請人,無香港IT人申請,去晒邊?為了香港?」點解會咁,左丁山邊會有解釋。6.9及6.12 IT員工請假,幾乎肯定係去咗上街遊行啦。前日中午吃飯,有一位參加者係金融界人士,佢話老公在中資公司工作,自6月7日公司開始已不准員工遲到早退,如要請假就從嚴批核,問清問楚,目的就係阻止員工參加上街示威。

年輕人思維已與建制派老闆階層、政府高層完全脫節,全無共通點。年輕人不知天高地厚,去衝擊中聯辦,可能係一時血氣上升,心口寫個勇字,冇諗過嚴重政治後果,在策略上並不明智,給予政府與北京一個完美藉口從嚴鎮壓,更加會收緊香港自由度;但其中亦有疑點,如建制派大將劉兆佳教授所講,為何警察棄守中聯辦,竟然冇警察守衞中華人民共和國國徽!劉兆佳認為警察必須解釋,我哋要警方解釋,警方可以唔理,但劉兆佳質疑噃,盧偉聰唔會藐視呀嘛!又嚟空城計?劉兆佳話衝擊中聯辦可能會民意形勢逆轉,本來未必唔啱,但劉大教授發夢都諗唔到,政府有豬一般的隊友,竟然會在元朗衝入西鐵站瘋狂打人打記者,令元朗惡棍臭名遠播全世界!於是咯喎,香港無人理會中聯辦咯,全城聚焦於元朗黑、警勾結之可能性,何君堯鋒頭竟然遮蓋王志民,西環坼天都好,冇人理咯,元朗白衣惡棍恐怖襲擊平民,更加震動四方!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載