› 選擇地區
三藩市
紐約
洛杉磯
其他美國地區
香港 台灣 北美
 
2019年08月13日

十年後掌舵人 - 左丁山

翻查今年2月4日本欄寫豬年立春,當日係破日(己亥年丙寅月壬申日丙午時,寅月申日,寅申相沖,兼且申亥相害),立春係破日,當然不吉。當時講過豬年要注意流水四竄為患,要防水災,千萬估唔到,林鄭月娥心急推出《逃犯條例》修訂,激發市民遊行示威,變成今日混亂局面,而年輕示威者之整體口號就是Be Water,示威遍地開花,正合水流四竄之義,釀成「水災」。邊個係始作俑者?當然係林鄭,佢就係製造混亂局面,令香港懼恐,北京氣頂,台灣隔岸觀火,特朗普有新籌碼與中國談判貿易戰,林鄭不顧大局,不看國際形勢,如一個過度活躍老婦走入瓷器店,打棒球,水災就此形成。

肥仔K係80後,已非街上勇武年輕人,但80後有自己網絡,其中有不少初露頭角,已上位或即將上位嘅才俊專業人士,如醫生、律師、建築師、會計師、工程師等等,呢班明日香港掌舵人,應該十年內接掌政府、商界、科技界及專業界高級職位。據肥仔K講,呢批人以黃絲佔大多數,只有少數急於求成嘅,會投靠民建聯變成藍絲,希望更早可以做到副局長或是局長,因為在親疏有別世界,做民建聯係識時務者為俊傑,跟泛民走,一定會被政府列入黑名單也。

問題係有咁多黃絲精英十年內接管不少功能組別,民建聯工聯會嘅人才多數係second tier級數,搵個曾鈺成接班人都難,特區政府將來揀人會好頭痛,假如情況不變,2027年受欽點嘅特首,大概只會有成班類似劉江華咁嘅人才來做局長,律政司司長要揀到梁美芬,該煨未!肥仔K班朋友之中,有一位係劍橋大學畢業生,返到香港之後,讀JD然後考到律師牌,本可到大律師行搞IPO搵真銀,但呢位仁兄竟然選擇到小型本地律師行,任人權律師,近月忙到氣咳,頻頻撲去警署或法院,為年輕人服務,肥仔K問佢點解唔搵銀而去搵辛苦,呢位劍橋精英話:「入劍橋初階已讀羅素、維根斯坦打基礎,然後讀尼采、康德、沙特,既然做咗律師就應該陸續為真正需要法律公義嘅人服務,唔應該為搵錢而搵錢。」此乃通識教育之真正意義,劍橋大學之通識教育自然重視人文精神與明辨思維。肥仔K在大學亦讀過洛克、盧梭、黑格爾與馬克思,最近有感林鄭之頑固,特別重溫社會契約論。佢問:「你估林鄭在港大有冇讀過Social Contract呢?」左丁山只能講一聲:「木宰羊!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載