› 選擇地區
三藩市
紐約
洛杉磯
其他美國地區
香港 台灣 北美
 
2019年10月02日

中美博弈香港重要 - 左丁山

路透社(路透社)

上星期五晚上11時許,左丁山還在看電視,當時CNBC打出杜瓊斯指數升咗125點,於是轉台睇電影HBO等頻道,全部播舊戲,播完又播,唔怕悶死訂戶,唔怪得英超直播咁受歡迎,起碼不少球賽緊張刺激,好過第50次睇湯告魯士扮職業特工。於是再轉台睇股市,即時嚇親,乜幾分鐘之內,杜瓊斯已冇晒升幅,反而下跌幾點。

跟住新聞湧至:原來美國媒體報導白宮研究禁制中國公司在美國上市,將在美國上市之中資公司除牌,限制美國政府退休金買入中資股票。消息一出,市場大驚,基金公司拋售股票,阿里巴巴曾跌6%,收市跌5.15%,於是拖累美股三大指數由升轉跌。

此消息雖然屬實,但估計未必會好快實施,畢竟美國商界不同中國商人,夠膽向政府說不,說不之商人亦不會畀盲目五毛亂咁砌商人不愛國。呢啲政策若要落實嘅話,會遭司法挑戰,納斯特克交易所已經立刻反對:「美國資本市場的關鍵素質是為所有符合條件的企業,提供非歧視性的、公平的進入……」在現時中美貿易談判階段,白宮放風,好可能係談判策略,威脅中國如不達成貿易協議,美國可能在金融方面對付中國企業限制或制裁,削弱中國企業融資能力。

美國好多券商都反對白宮「剝奪收成期」,因為中國企業(如阿里巴巴)在美國上市,華爾街有大錢可賺,白宮要斷華爾街米路,特朗普未必可以咁容易得到政治捐款。之不過,即使係咁意講吓,北京應已感受到美國威脅,必須制定Plan B,以防不怕一萬,只怕萬一。因中共永遠不會放棄黨監控與黨控制,上海股市有先天性缺陷,難登世界舞台(此亦是前重慶市長黃奇帆指香港金融中心地位,無可代替之深層原因),Plan B當然就是香港,試問倘若美國真係要將百度、搜狐、阿里巴巴等公司除牌嘅話,唔通全部返上海股市掛牌,自絕於國際市場?阿里巴巴月前話要在香港掛牌,必然已諗過呢個可能性。港交所失驚無神去收購倫敦交易所,人地唔睬都要強行搶親,上星期委託財務顧問安排771億港元銀團貸款,作收購戰子彈。有財經人猜測,港交所咁勇,不排除係為國捐軀,一旦成功併購倫敦交易所,紐倫港三大市場,中國可得其二,那怕美國封鎖!但即使北京有如此大戰略,特朗普可能會一早通知英國政府:不得批准港交所收購!林鄭月娥識唔識諗呀?中國好需要香港為一個國際融資窗口,唔好將件香港高端瓷器用伸縮棍扑碎呀!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載