› 選擇地區
三藩市
紐約
洛杉磯
其他美國地區
香港 台灣 北美
 
2019年12月04日

內地叻人多 - 左丁山

午飯後行街,行到IFC中庭,見到一對男女站立,似乎係等待朋友,點知男士向左丁山微笑講句Hi,於是企定定一望,竟然係二十幾年未見過嘅會計師P,旁邊女士就係P太太。會計P開聲講:「多年未見,但我知你係左丁山,我日日睇㗎,你好嘢吖!」問佢有乜好嘢呀?會計P話:「坦白講,我係大陸銀紙養大嘅,因為我爸爸係做國貨生意㗎,叫做賺過吓大陸錢,但佢臨去天堂之時,細細聲在我耳仔邊講,記住共產黨信唔過。當時我以為佢臨終神志不清,但現在睇一國兩制,港人治港嘅發展情況,記起老竇嗰句說話,先至醒悟佢嘅說話有道理!」估唔到會計P竟然講出呢番說話,可見今年六月以來嘅社會運動,實在觸發香港人神經,令不少人重新soul-searching。

不過一位自紐約回來探親嘅校友就唔係咁樣見解。佢移民多年,在紐約生根,屬於過咗收成期,有大把穀種,生活無憂之人,經常有「報國之心」,三十年來不斷捐錢出力推動中美學生交流,兩公婆返回大陸無數次,確認國家進步一日千里,青年學生個個奮進向上,朝氣蓬勃,去到紐約讀書,好快成績就名列前茅。故此佢話香港大學生反共,令佢大惑不解,係唔係食錯藥,佢見到之現象,未必錯嘅,經常出入上海北京,有人「安排往山區見貧童,當然見盡不少精英級數青年。」中國一年有八百萬個大學生畢業,北京上海佔盡最top的 1%,冚𠾴唥係叻仔叻女,有乜出奇。總計1978-2017年中國大學畢業人數,共9294萬人,佔總人口約近7%,以同樣比例計算,香港大學畢業生只應該有51.8萬人,你話喺九千三百萬人中搵到二十萬個超級尖子容易吖?還是從52萬人中搵到二十萬個超級尖子容易?故此話內地人好多叻人,香港差好多,一定啱,但引伸出去講,香港大學生同大陸差好遠,是否合乎道理,唔該自己判斷。以數理工科計,內地優秀學生成就非凡(例如張翔),但以社會科學學生計,內地大學限於瞎捧馬列,實在幾難出到國際級精英,思想教育受黨控制嘅大學,點會生產到思想大師噃!但現實社會係崇拜理工科之成功人物,科工興國嘛,故此中國價值觀與西方價值觀有顯著分別。香港素來係開放社會,學生老師都唔慣接受單一思想教育,反而更有創意。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載